Yevropa Ittifoqining O‘zbekiston uchun 2021—2027-yillarda ajratiladigan moliyaviy yordami koronavirus pandemiyasi oqibatlarini yumshatishga va mamlakatda kambag‘allik darajasini pasaytirishga yo‘naltiriladi. Bu haqda Investitsiyalar va tashqi savdo vazirligi xabar berdi.
Vazirlik tomonidan ma’lum qilinishicha, 10-iyun kuni O‘zbekiston bosh vazirining o‘rinbosari — investitsiyalar va tashqi savdo vaziri Sardor Umurzoqov va Yevropa Ittifoqi savdo bo‘yicha komissari Fil Xogan o‘rtasida videokonferensiya bo‘lib o‘tdi. Suhbat davomida koronavirus tarqalishiga qarshi kurashda O‘zbekiston va Yevropa Ittifoqi o‘rtasidagi o‘zaro harakatlarning ustuvor masalalari, shuningdek, hamkorlikning qator dolzarb yo‘nalishlari muhokama qilindi.
“COVID-19’ning O‘zbekiston iqtisodiyotiga salbiy ta’sirini yumshatish va kambag‘allikni qisqartirish kabi kelgusidagi hamkorlikning ustuvor yo‘nalishlari aniqlandi. Bu maqsadlarga Yevropa Ittifoqining 2021—2027-yillar uchun navbatdagi budjet davri doirasida ajratiladigan mablag‘larning sezilarli qismini yo‘naltirish rejalashtirilgan”, — deyiladi vazirlik xabarida.
Ta’kidlanishicha, O‘zbekiston va Yevropa Ittifoqi o‘rtasida Kengaytirilgan sheriklik va hamkorlik to‘g‘risidagi bitim loyihasi bo‘yicha kelishishni tezlashtirish borasidagi ishlarni faollashtirish yuzasidan kelishuvga erishildi, buning uchun yaqin vaqtlarda muzokaralarning navbatdagi oltinchi raundini onlayn tarzda o‘tkazish istiqbollari muhokama qilindi.
Muzokaralar davomida moliyaviy-texnik hamkorlik sohasidagi ijobiy sur’atlar qayd etildi. Yevropa tomoniga umumiy qiymati 40 million yevroni tashkil etuvchi “Qishloq xo‘jaligi sohasini budjetdan qo‘llab-quvvatlash va O‘zbekistonga qo‘shimcha yordam” loyihasi doirasida 10 million yevro miqdoridagi birinchi transh uchun alohida minnatdorchilik bildirildi.
Bundan tashqari, 2020-yilda rejalashtirilgan bir qator ikki tomonlama tadbirlarni videokonferensaloqa orqali o‘tkazish bilan bog‘liq tashkiliy masalalar ko‘rib chiqildi. Ular orasidan “O‘zbekiston — YeI” hamkorlik qo‘mitasining 17-yig‘ilishi, iqtisodiyot, savdo va investitsiyalar bo‘yicha “O‘zbekiston — YeI” quyi qo‘mitasining 15-yig‘ilishi va taraqqiyot maqsadlarida hamkorlik bo‘yicha “O‘zbekiston — YeI” quyi qo‘mitasining 3-yig‘ilishi o‘rin olgan.
Avvalroq O‘zbekiston Respublikasi Prezidenti Shavkat Mirziyoyev Yevropa kengashi prezidenti Sharl Mishel bilan koronavirusga qarshi kurash masalasini muhokama qilgandi.
Eslatib o‘tamiz, Yevropa tiklanish va taraqqiyot banki O‘zbekiston banklariga yordam tariqasida 220 million dollar, O‘zbekiston kompaniyalarini qo‘llab-quvvatlash uchun 150 million dollar ajratishi ma’lum qilingan.
Izoh (0)