Qozog‘iston va Qirg‘iziston davlat chegaralaridagi barcha o‘tkazish punktlarini ochish va ikki mamlakat o‘rtasida yuk tashuvlarining hech qanday muammosiz ta’minlanishiga kelishib oldi. Bu haqda 10-iyun kuni Qozog‘iston bosh vaziri Asqar Mamin va Qirg‘iziston bosh vaziri Muhammadkaliy Abilgaziyev o‘rtasida bo‘lib o‘tgan telefon muloqotidan so‘ng, ma’lum bo‘ldi.
Shuningdek, tomonlar koronavirus tarqalishiga qarshi o‘zaro hamkorlik hamda aholini undan himoya qilish masalalarini ham muhokama qilgan.
Avvalroq Qirg‘iziston Iqtisodiyot vazirligi Qozog‘istonni Yevrosiyo iqtisodiy ittifoqi (YeOII) mamlakatlarining tovarlar, shu jumladan, ijtimoiy ahamiyatga ega va oziq-ovqat mahsulotlari erkinligi to‘g‘risidagi kelishuviga rioya qilmaganlikda ayblagan edi. Idora ma’lumotlariga ko‘ra, Qozog‘iston yettita nazorat punktidan beshtasini yopib qo‘ygan va mashinalar chegaradan o‘tishda 3-4 kunlab qolib ketgan. Bu vaqtda esa Qirg‘iziston chegarasidan o‘tish ishlari uch barobar tezroq amalga oshirilgan.
Qozog‘iston Savdo va integratsiya vazirligi respublika bir yildan ko‘proq vaqtdan beri qo‘shni davlatni raqamli texnologiyalardan keng foydalangan holda tovarlar harakatida oshkoralik masalasini hal etish, harakatlanayotgan transport vositalari to‘g‘risida ma’lumotlarni almashish, yuk mashinalariga elektron muhrlarni qo‘llashga chaqirib kelayotgani, biroq “Bishkek Nur-Sultonning konstruktiv takliflarini ‘eshitmayotgani’ni” ma’lum qilgandi.
Avvalroq Toshkent—Dushanbe o‘rtasidagi aviaqatnovlar 1-iyuldan qayta yo‘lga qo‘yilishi mumkinligi haqida xabar berilgandi.
Izoh (0)