Коронавирус пандемияси тарқалишига йўл қўймаслик мақсадида Ўзбекистонда жорий этилган карантин чоралари сабаб, 2020 йилги муддатли ҳарбий хизматга кетиш учун сараланган ёшларнинг армияга юборилиши кечиктирилган эди. Шимоли-ғарбий ҳарбий округ матбуот хизматининг маълум қилишича, 9 июнь куни чақирилувчиларни муддатли ҳарбий хизматга юбориш яна бошланган.
Таъкидланишича, мамлакат бўйлаб коронавирус пандемияси туфайли ўрнатилган карантин чораларининг юмшатилиши натижасида шу кунларда армия сафларини тўлдиришга улгурмаган ёшлар муддатли ҳарбий хизматга йўл олмоқда.
Хусусан, 9 июнь куни Қорақалпоғистон Республикаси ва Хоразм вилояти мудофаа ишлари бошқармалари томонидан 500 нафарга яқин ёшлар муддатли ҳарбий хизматни ўташ учун «Ўзбекистон темир йўллари» АЖ томонидан рейсга қўйилган махсус поездларда жўнаб кетди.
Ҳарбий хизматга кетишдан бир неча кун олдин эса чақирилувчилар вилоят Мудофаа ишлари бошқармаларида ташкил этилган Ҳарбий-тиббий комиссия кўригидан ўтган.
Аввалроқ ҳарбий хизматни ўташ ёшига етган фуқаролар карантиндан сўнг хизматга чақирилиши мумкинлиги тўғрисида хабар берилганди.
Мавзуга доир: Мудофаа вазирлиги: «Бир ойлик хизматга пулини тўлаб қўйган фуқароларнинг пуллари қайтариб берилмайди»
Изоҳ (0)