Smartfon uchinchi shaxs tomonidan tinglanayotganini qanday bilish mumkin?

Ba’zida smartfonlar o‘zini g‘alati tutishi mumkin: o‘z-o‘zidan o‘chib-yonishi, “og‘ir” dasturlar yuklanmasa ham quvvati tez tugashi. “Praym” nashrining TelecomDaily axborot-tahlil agentligi rahbari Denis Kuskovga tayanib ma’lum qilishicha, bu kabi holatda qurilma buzib kirilgan va uni uchinchi shaxs tinglayotgan bo‘lishi mumkin.

Kuskov o‘zganing telefonini tinglashni qonuniy va noqonuniyga ajratishni taklif etadi. Ularning birinchisi bilan buni amalga oshirish uchun yetarlicha asosga ega politsiya va boshqa kuch tuzilmalari shug‘ullanadi. Shuningdek, o‘zganing telefonini noqonuniy ravishda tinglashni tanishlar yoki firibgarlar amalga oshirishi mumkin — buning uchun ular politsiya tutgan yo‘ldan foydalanmaydi.

Telefon tinglanayotganini birinchi navbatda qurilmada paydo bo‘lgan notanish dastur orqali aniqlash mumkin. Shu sababli, smartfonga biror dasturni o‘rnatishdan oldin uni yaxshilab tekshirish kerak.

“Bundan tashqari, telefon qandaydir o‘z hayoti bilan yashayotgan bo‘lsa: teginmasangiz ham o‘chib-yonsa, bu smartfonni tinglash dasturi ishga tushirilganini bildiradi. Telefondan foydalanmasangiz ham, u qizib ketsa (batareya yoki bu turdagi muammolarga bog‘liq dasturiy ta’minot sabab ham bo‘lishi mumkin), muammo mavjud, odatda u normal temperaturada bo‘lishi kerak”, — deydi Kuskov.

Shuningdek, akkumulyatorning haddan ortiq sarfiga fondagi biror dastur ham sababchi bo‘lishi mumkin. Masalan, moskvaliklar karantindagilarni kuzatishga mo‘ljallangan “Ijtimoiy monitoring” ilovasi juda ko‘p quvvat sarfiga olib kelishidan shikoyat qilmoqda. Ko‘plab zamonaviy smartfonlar tizim sozlamalaridagi ilovalar faolligini kuzatish imkonini beradi, shu sababli “qoidabuzar”ni aniqlash qiyinchilik tug‘dirmaydi.

Yuqorida keltirilgan sabablar smartfon egasining shaxsiy chegarasi buzilganini bildiruvchi yagona sabab emas. Qurilma “boshqa nuqtadan” tinglanayotganini messenjer va ijtimoiy tarmoq dasturchilari ishlab chiqaruvchilarga reklama uchun shaxsiy ma’lumotlarni taqdim etayotganidan ham bilsa bo‘ladi. Biroq bu qonuniy, chunki barcha ro‘yxatdan o‘tish vaqtida “foydalanuvchi bitimi”ni qabul qiladi.