Shavkat Mirziyoyev farmoni asosida 2019-yil iyul oyida yosh olimlarga Sergeli tumanidagi ko‘p qavatli uydan xonadonlar ajratilgan. Biroq ularning 42 nafariga uylar haligacha berilmagan. Mazkur masala yuzasidan izoh so‘rab Toshkent shahar hokimiga so‘rov yuborilgan.
Senat matbuot xizmati xabarida aytilishicha, 2019-yil iyul oyida Prezident farmoni qabul qilinganidan so‘ng bank xodimlari, Fanlar akademiyasi rahbarlari maxsus komissiya yordamida uy-joyga muhtoj ilmiy xodimlarni aniqlagan.
Uy-joyga muhtoj deb topilgan 42 nafar yosh olim va ularning oila a’zolariga 7 qavatli turar joy ajratilgan. Ajratilgan binoda 42 ta xonadon bo‘lib, ular ikki va uch xonali kvartiralardan iborat. Uylarga da’vogar olimlar tomonidan 2019-yilning noyabr oyigacha 1 milliard 350 million so‘mdan ortiq pul mablag‘lari “Ipoteka” bankining Shayxontohur tumani filialiga to‘lab berilgan.
Biroq ushbu uylar 2020-yil yanvar oyida qurib bitkazilgan bo‘lsa-da, yosh olimlarga berilmagan.
“Mazkur masala Oliy Majlis Senati Yoshlar, madaniyat va sport masalalari qo‘mitasi tomonidan nazoratga olindi. Shu bilan birga, qo‘mita tomonidan yosh olimlar duch kelayotgan muammolar yuzasidan izoh so‘rab Toshkent shahar hokimiga senator so‘rovi yubordi.
Hokimlik tomonidan ushbu so‘rovga javob olingandan so‘ng yana batafsil ma’lumot beriladi”, — deyiladi Senat axborot xizmati xabarida.
Eslatib o‘tamiz, 2019-yilning iyun oyida Toshkent shahar hokimi Jahongir Ortiqxo‘jayev Fanlar akademiyasi Genomika va bioinformatika markazi tayanch doktoranturasida tahsil olayotgan uch kishiga Prezident sovg‘asi — bir xonali uylar kalitini topshirgandi.
Izoh (0)