Инновацион ривожланиш вазирлиги Беҳруз Ҳамзаевнинг «Вазирлик ташкил этилиши менинг ғоям» деган иддаоларига муносабат билдирди.
Қайд этилишича, 26 май куни блогер Кирилл Альтманнинг Беҳруз Ҳамзаевдан олган интервьюси Youtube ижтимоий тармоғига «Вазирликни очиш — осон, Ўзбекистонни инновацион мамлакат қилиш — қийин» сарлавҳаси билан жойлаштирилди.
Мазкур интервьюда Беҳруз Ҳамзаев World Influencers Network асосчиси, «Зиё Форум» ривожланиш ва таълим жамғармаси директори ўринбосари, Инновацион ривожланиш вазирлиги тузилишининг ташаббускори ҳамда Туризмни ривожлантириш давлат қўмитаси раисининг собиқ маслаҳатчиси, Ўзбекистонда амалга оширилган кўплаб лойиҳалар, концепциялар, стратегиялар ва қонунларнинг муаллифи сифатида таништирилган.
Суҳбат давомида Беҳруз Ҳамзаев «Инновацион ривожланиш вазирлигининг ғояси мендан чиққан, улар вазирлик номини ҳам нотўғри қўйган» деб фикр билдирган.
Вазирлик матбуот хизматининг таъкидлашича, Инновацион ривожланиш вазирлиги Президент ташаббуси билан 2017 йилнинг ноябрь ойида ташкил этилган. Бунга бағишланган фармон ва қарорларни ёзиш ишларида унинг иштироки ҳақида ҳеч қандай расмий маълумотлар ҳам йўқ.
«Тўғри, иқтидорли ёш мутахассис томонидан блогер Кирилл Альтманга кўрсатилган ‘Ўзбекистон Республикасининг келажак, новаторлик ва ҳамкорлик вазирлиги’ деб номланган брошюраси уч йил аввал масъул ходимларга тақдим этилган ва унинг бу ғоясини кимдир қўллаб-қувватлаган ҳам бўлиши мумкин. Лекин бу унинг «Инновацион ривожланиш вазирлигини мен ташкил этганман» дейиши учун асос бўла олмайди», — дейилади расмий муносабатда.
Бундан ташқари, Беҳруз Ҳамзаев Инновацион ривожланиш вазирлигида расман фаолият юритмагани, унинг акаси Беҳзод Ҳамзаев бошқарма бошлиғи лавозимида ишлаган даврда унинг олдида юргани таъкидланган.
«Беҳруз Ҳамзаевнинг вазирликни ташкил этилиши бўйича ҳужжатларни тайёрлаш учун 50 минг доллар сарфлагани ҳақидаги гапи эса Ўзбекистон давлат органлари фаолияти билан озроқ бўлса-да таниш бўлган ҳар қандай киши учун ҳам кулгили, ҳам мантиқсиз иддаодир», — дейилади вазирлик муносабатида.
Интервьюда Беҳруз Ҳамзаев Инновацион ривожланиш вазирлиги тузилганидан бери бирор иш қилмагани ҳақида ҳам гапирган. Вазирлик бу гапларининг ўринсиз ва асоссиз эканини тасдиқловчи маълумотлар келтирган.
Изоҳ (0)