Osiyo taraqqiyot banki O‘zbekistonga koronavirus epidemiyasiga qarshi kurashish uchun 1,36 million AQSh dollari miqdoridagi mablag‘ ajratilishni tasdiqladi. Bu haqda bank matbuot xizmati xabar bergan.
Grant sog‘liqni saqlash tizimi xodimlari uchun shaxsiy himoya vositalari, tibbiyot sohasining boshqa buyumlarini xarid qilishga sarflanadi va bu orqali O‘zbekistonda sohani rivojlantirish yuzasidan ishlar amalga oshiriladi.
Mablag‘lar Osiyo taraqqiyot bankining COVID-19 koronavirus va boshqa yuqumli kasalliklarga qarshi kurashni mintaqaviy qo‘llab-quvvatlash texnik ko‘maklashish resurslari hisobidan ajratiladi va dastlabki texnik yordam — 200 ming AQSh dollari mart oyida O‘zbekistonda tibbiyot buyumlarini xarid qilish uchun ajratilgan.
Osiyo taraqqiyot banki joriy qarz hisobidan 19,5 million dollarni qayta taqsimlab, O‘zbekistonning 800 ta sun’iy nafas oldirish apparati xarid qilishiga imkoniyat yaratgan.
Osiyo taraqqiyot banki hukumat va boshqa hamkorlar bilan O‘zbekiston sog‘liqni saqlash tizimini takomillashtirish yuzasidan ishlarni davom ettiradi, deyilgan bank bayonotida.
Avval XVJ O‘zbekistonga 375 mln dollar ekvivalentidagi imtiyozli kredit ajratilishini ma’qullagani, Osiyo infratuzilmaviy investitsiya banki O‘zbekistonda sog‘liqni saqlash tizimi va tadbirkorlikni qo‘llab-quvvatlashni rejalashtirayotgani hamda Jahon banki tomonidan Markaziy Osiyoga ajratilgan 370 mln dollarning asosiy qismi O‘zbekistonga nasib etgani haqida xabarlar berilgan.
Izoh (0)