Kaliforniyalik erkak supermarketga “Ku-kluks-klan” qalpog‘ida keldi. U koronavirusdan shu tarzda himoyalanmoqda

AQShning Kaliforniya shtati San-Diyego shahrida yashovchi erkak supermarketga “Ku-kluks-klan” qalpog‘ida keldi, deb yozadi Esquire.

Erkakni supermarketdagi boshqa odamlar videoga oldi va internetda tarqatdi. U hatto telekanallar nazariga ham tushdi. Shundan keyin erkak bilan politsiya qiziqib qoldi.

Ma’lumot uchun, “Ku-kluks-klan” AQShda 1860-yilda tashkil etilgan terrorchilik tashkiloti hisoblanadi.

Tashkilot oq tanli millatchilarning qora tanlilar ustidan millatchilik g‘oyalarini qo‘llab-quvvatlagan. Terrorchilik tashkiloti a’zolari uzun oq plash va ko‘z uchun teshiklari bo‘lgan oq qalpoq kiyib yurgan. Tashkilot tomonidan turli hisob-kitoblarga ko‘ra, 100 ming kishi, asosan, qora tanlilar o‘ldirilgan.

Supermarket xodimlari erkakdan qalpoqni yechishni so‘ragan, lekin u yechmagan.

Okrug sherifi departamenti ham erkakni jazolamaslikka qaror qildi. Sababi Kaliforniya qonunchiligiga ko‘ra, fuqarolarga istalgan turdagi himoya vositalaridan foydalanish majburiy etib belgilangan.

Biroq departament xodimlari bu voqeadan so‘ng odamlarga qanday niqob tutish mumkin, qanday vositadan foydalanish esa mumkin emasligini qat’iy belgilab qo‘yishni rejalashtirmoqda.

Erkakning o‘zi esa u shunchaki virusdan himoyalanish maqsadida qalpoqni kiyganini aytgan.