Germaniyalik olimlar yangi turdagi koronavirusga qarshi samara berishi mumkin bo‘lgan yangi dorilarning nomini ma’lum qildi. Tadqiqot natijalari Germaniyaning Mayns universiteti saytida e’lon qilingan.
Mayns universiteti mutaxassislari Mogon II superkompyuteri yordamida SARS-CoV-2 virusiga qarshi kurashda virusga qarshi dorilarning samaradorligini tahlil qildi. Qurilma ochiq ma’lumotlar bazalarida tavsiflangan 42 mingta turli tibbiy modda bilan hisob-kitoblarni amalga oshirgan. “Kompyuter modellashtirishining mazkur usuli molekulyar ulanish sifatida tanilgan va u fanda bir necha yillardan buyon qo‘llaniladi”, — deyiladi olimlarning hisobotida.
Taxminan ikki oy davom etgan tadqiqotlar asosida superkompyuter SARS-CoV-2 virusining qismlarini bog‘lash va neytrallashtirish imkoniyatiga ega bo‘lgan gepatit C’ga qarshi qo‘llaniladigan dori vositalarini topdi. Ularning qatoridan simeprevir, paritaprevir, grazoprevir va velpatasvir o‘rin olgan.
Kompyuterning hisob-kitoblarini tekshira turib olimlar SARS-CoV-2 va gepatit C kasalligining qo‘zg‘atuvchisini bir zanjirlik RNK viruslari qatoriga kiritish mumkinligini aniqladi. Tadqiqot ishtirokchisi professor Tomas Effertning ma’lum qilishicha, mazkur ilmiy ishning natijalari laboratoriya tajribalari va klinik sinovlar yordamida tekshirilishi kerak.
Izoh (0)