“Human.uz” sayti Telegram kanalida “Bugun ‘Jahon matbuoti erkinligi kuni’midi?!” nomli videolavha joylashtirildi. Qayd etilishicha, Sirdaryo viloyatida bo‘lib turgan sayt muxbirlari Sardobadagi avariya tufayli evakuatsiya qilinib, viloyatning olimpiya zaxiralari kollejiga joylashtirilgan odamlardan intervyu olib, reportaj tayyorlash uchun kelgan. Biroq o‘sha yerdagi ichki ishlar xodimlari ularga to‘sqinlik qilgani va tasvirchilar mashinaga solib olib ketilgani bayon etilgan.
Videoda uni tasvirga olayotgan jurnalistining “Operatorni nega olib ketyapsiz?”, deb so‘ragani, organ xodimi “Siz qonun talablariga qarshilik qilyapsiz”, deb aytgani, biroq qanday qonun talablari buzilgani haqidagi savolga javob bermay, “Olib bor, ‘zapis’larni ko‘rasan, o‘chirib tashlaysan”, deb aytgani aks etgan.
Mazkur holat yuzasidan IIV matbuot xizmati munosabat bildirib, vazirlik tomonidan tekshiruv o‘tkazilib, xodimlar xatti-harakatlariga huquqiy baho berilishi bidirilgan.
Eslatib o‘tamiz, Sardobadagi suv toshqinidan Qo‘rg‘ontepa va Do‘stlik aholi yashash punktlari jiddiy zarar ko‘rdi. Hodisadan so‘ng 70 mingga yaqin fuqaro xavfsiz hududlarga evakuatsiya qilingan hamda Sirdaryo va Jizzax viloyatlari hududida tashkil etilgan maxsus muassasalarga joylashtirilgan.
Izoh (0)