«Human.uz» сайти Telegram каналида «Бугун ‘Жаҳон матбуоти эркинлиги куни’миди?!» номли видеолавҳа жойлаштирилди. Қайд этилишича, Сирдарё вилоятида бўлиб турган сайт мухбирлари Сардобадаги авария туфайли эвакуация қилиниб, вилоятнинг олимпия захиралари коллежига жойлаштирилган одамлардан интервью олиб, репортаж тайёрлаш учун келган. Бироқ ўша ердаги ички ишлар ходимлари уларга тўсқинлик қилгани ва тасвирчилар машинага солиб олиб кетилгани баён этилган.
Видеода уни тасвирга олаётган журналистининг «Операторни нега олиб кетяпсиз?», деб сўрагани, орган ходими «Сиз қонун талабларига қаршилик қиляпсиз», деб айтгани, бироқ қандай қонун талаблари бузилгани ҳақидаги саволга жавоб бермай, «Олиб бор, ‘запис’ларни кўрасан, ўчириб ташлайсан», деб айтгани акс этган.
Мазкур ҳолат юзасидан ИИВ матбуот хизмати муносабат билдириб, вазирлик томонидан текширув ўтказилиб, ходимлар хатти-ҳаракатларига ҳуқуқий баҳо берилиши бидирилган.
Эслатиб ўтамиз, Сардобадаги сув тошқинидан Қўрғонтепа ва Дўстлик аҳоли яшаш пунктлари жиддий зарар кўрди. Ҳодисадан сўнг 70 мингга яқин фуқаро хавфсиз ҳудудларга эвакуация қилинган ҳамда Сирдарё ва Жиззах вилоятлари ҳудудида ташкил этилган махсус муассасаларга жойлаштирилган.
Изоҳ (0)