“O‘zgidromet”ning yozishicha, respublikaning markaziy hududlarida oyning birinchi yarmida o‘rtacha harorat 24-27 daraja, ikkinchi yarmida 28-31 daraja iliqni tashkil qiladi. Shu bilan birga mayda xuddi yozdagidek issiq — 33-36 daraja va undan yuqori haroratli kunlar ham bo‘ladi.
Yomg‘irli kunlar soni aprelga qaraganda kamroq, biroq yomg‘irlar qisqa muddatli va deyarli har doim momaqaldiroqli bo‘lishi kuzatiladi. Bu yilgi may oyining dastlabki kunlaridagi ob-havo aprel oyi oxirining ob-havosini eslatadi.
1-may, juma kunidan, O‘zbekistonning janubi-g‘arbiy tumanlariga bu safar Kaspiy dengizining janubiy hududlaridan Turkmaniston orqali nam havo oqimi kirishni boshlaydi.
Buxoro, Navoiy, Qashqadaryo, Surxondaryo va Samarqand viloyatlarida kunning ikkinchi yarmida respublikaning qolgan hududida kechga borib yomg‘ir, ayrim joylarda kuchli yomg‘ir yog‘adi. Momaqaldiroq bo‘lishi mumkin. Faqat Qoraqalpog‘iston Respublikasi hamda Farg‘ona vodiysi viloyatlarida yog‘ingarchilik bo‘lmaydi.
2-may kuni Qoraqalpog‘istonda va Xorazm viloyatida yog‘ingarchilik bo‘lmaydi, Buxoro va Navoiy viloyatlarida yomg‘ir ertalabgacha to‘xtaydi va kunduzi havo ochiq bo‘ladi. Respublikaning qolgan hududlarida nobarqaror ob-havo saqlanib turadi, ba’zi joylarda yomg‘ir, kuchli yomg‘ir yog‘ishi hamda momaqaldiroq bo‘lishi mumkin.
3-may kuni Qoraqalpog‘iston Respublikasi hamda Xorazm, Buxoro, Navoiy viloyatlaridan tashqari qolgan joylarda yomg‘ir yog‘ishi, momaqaldiroq bo‘lishi mumkin.
4-may kunidan vaziyat yana takrorlanib, respublikaning janubi-g‘arbiy tumanlariga navbatdagi nam havo kirish kutilmoqda, keyin ushbu havo oqimi butun respublika hududiga tarqaladi.
4-may kuni Buxoro, Navoiy, Qashqadaryo, Surxondaryo va Samarqand viloyatlarida, 5—6-may kunlari esa butun respublika bo‘ylab yomg‘ir yog‘ishi va momaqaldiroq bo‘lishi mumkin, faqat Qoraqalpog‘istonda va Xorazm viloyatida bu kunlarda yog‘ingarchilik bo‘lmaydi.
5—6-may kunlari harorat 23-28 daraja atrofida, yomg‘ir vaqtida 20-25 daraja iliqni tashkil qiladi.
7-may kunidan boshlab to oyning birinchi o‘n kunligi oxirigicha mamlakatda ob-havoning yog‘ingarchiliksiz bo‘lishi kutilmoqda, harorat ko‘tarila boshlaydi va 10-maygacha 29-32 darajagacha isiydi.
May oyining ikkinchi va uchinchi o‘n kunligida harorat 30-35 darajadan 22-27 darajagacha o‘zgarib turishi mumkin. Ba’zi kunlarda qisqa muddatli momaqaldiroqli yomg‘irlar ham yog‘ishi mumkin.
Izoh (0)