Buxoro viloyatining Jondor tumani hududida yer silkinib, uy-joy va odamlarga talafot yetishi mumkinligi haqida vahima uyg‘otuvchi xabar tarqatgan va aholining yashash manzilini tark etishga urinishiga sabab bo‘lgan fuqarolar shaxsi ma’lum bo‘ldi. Bu haqda “Daryo”ga Buxoro viloyati IIB axborot xizmati ma’lum qilmoqda.
Aniqlanishicha, Jondor tumanining Po‘loti qishlog‘ida yashovchi fuqarolar — Rustam Xo‘jaqulov hamda Vohid Ravshanov “Jondor tumanida yer qimirlashi sodir bo‘ladi” deya norasmiy xabar tarqatib, aholi o‘rtasida “Tabiiy ofatlar keti uzilmayapti, manzildan chiqib ketish kerak” degan vahima keltirib chiqargan.
Mazkur vahima sabab 29-aprel, chorshanba kuni, tonggi soat 04:00 larda qishloqda yashovchi bir guruh fuqarolar oila a’zolari bilan yashash manzilini tark etib, tumandan chiqib ketishga uringan hamda qishloq hududida sarosima, tartibsiz holat yuzaga kelgan.
Holatga oydinlik kiritish maqsadida huquq-tartibot idoralari tomonidan surishtiruv harakatlari olib borilgan. Hamda aholi o‘rtasida vahima uyg‘otgan shaxslar aniqlangan. Vahimachi fuqarolar xatti-harakatidan pushaymon bo‘lib, tumandoshlaridan kechirim so‘ragan.
Ta’kidlanishicha, asossiz va yolg‘on xabar tarqatgan ikki shaxsga nisbatan Ma’muriy javobgarlik to‘g‘risidagi kodeksning 54-moddasi (epidemiyaga qarshi kurash qoidalarini buzish)ga asosan ma’muriy bayonnoma rasmiylashtirilgan.
Eslatib o‘tamiz, 2020-yil 28-aprel kuni “Qorako‘l va Olot tumanini suv bosadi” degan norasmiy va asossiz xabar tarqatgan shaxslar aniqlanib, ularga nisbatan ham ma’muriy bayonnoma rasmiylashtirilgan edi.
Mavzuga doir:
Izoh (0)