«Ўзгидромет»нинг ёзишича, республиканинг марказий ҳудудларида ойнинг биринчи ярмида ўртача ҳарорат 24-27 даража, иккинчи ярмида 28-31 даража илиқни ташкил қилади. Шу билан бирга майда худди ёздагидек иссиқ — 33-36 даража ва ундан юқори ҳароратли кунлар ҳам бўлади.
Ёмғирли кунлар сони апрелга қараганда камроқ, бироқ ёмғирлар қисқа муддатли ва деярли ҳар доим момақалдироқли бўлиши кузатилади. Бу йилги май ойининг дастлабки кунларидаги об-ҳаво апрель ойи охирининг об-ҳавосини эслатади.
1 май, жума кунидан, Ўзбекистоннинг жануби-ғарбий туманларига бу сафар Каспий денгизининг жанубий ҳудудларидан Туркманистон орқали нам ҳаво оқими киришни бошлайди.
Бухоро, Навоий, Қашқадарё, Сурхондарё ва Самарқанд вилоятларида куннинг иккинчи ярмида республиканинг қолган ҳудудида кечга бориб ёмғир, айрим жойларда кучли ёмғир ёғади. Момақалдироқ бўлиши мумкин. Фақат Қорақалпоғистон Республикаси ҳамда Фарғона водийси вилоятларида ёғингарчилик бўлмайди.
2 май куни Қорақалпоғистонда ва Хоразм вилоятида ёғингарчилик бўлмайди, Бухоро ва Навоий вилоятларида ёмғир эрталабгача тўхтайди ва кундузи ҳаво очиқ бўлади. Республиканинг қолган ҳудудларида нобарқарор об-ҳаво сақланиб туради, баъзи жойларда ёмғир, кучли ёмғир ёғиши ҳамда момақалдироқ бўлиши мумкин.
3 май куни Қорақалпоғистон Республикаси ҳамда Хоразм, Бухоро, Навоий вилоятларидан ташқари қолган жойларда ёмғир ёғиши, момақалдироқ бўлиши мумкин.
4 май кунидан вазият яна такрорланиб, республиканинг жануби-ғарбий туманларига навбатдаги нам ҳаво кириш кутилмоқда, кейин ушбу ҳаво оқими бутун республика ҳудудига тарқалади.
4 май куни Бухоро, Навоий, Қашқадарё, Сурхондарё ва Самарқанд вилоятларида, 5—6 май кунлари эса бутун республика бўйлаб ёмғир ёғиши ва момақалдироқ бўлиши мумкин, фақат Қорақалпоғистонда ва Хоразм вилоятида бу кунларда ёғингарчилик бўлмайди.
5—6 май кунлари ҳарорат 23-28 даража атрофида, ёмғир вақтида 20-25 даража илиқни ташкил қилади.
7 май кунидан бошлаб то ойнинг биринчи ўн кунлиги охиригича мамлакатда об-ҳавонинг ёғингарчиликсиз бўлиши кутилмоқда, ҳарорат кўтарила бошлайди ва 10 майгача 29-32 даражагача исийди.
Май ойининг иккинчи ва учинчи ўн кунлигида ҳарорат 30-35 даражадан 22-27 даражагача ўзгариб туриши мумкин. Баъзи кунларда қисқа муддатли момақалдироқли ёмғирлар ҳам ёғиши мумкин.
Изоҳ (0)