Бухоро вилоятининг Жондор тумани ҳудудида ер силкиниб, уй-жой ва одамларга талафот етиши мумкинлиги ҳақида ваҳима уйғотувчи хабар тарқатган ва аҳолининг яшаш манзилини тарк этишга уринишига сабаб бўлган фуқаролар шахси маълум бўлди. Бу ҳақда «Дарё»га Бухоро вилояти ИИБ ахборот хизмати маълум қилмоқда.
Аниқланишича, Жондор туманининг Пўлоти қишлоғида яшовчи фуқаролар — Рустам Хўжақулов ҳамда Воҳид Равшанов «Жондор туманида ер қимирлаши содир бўлади» дея норасмий хабар тарқатиб, аҳоли ўртасида «Табиий офатлар кети узилмаяпти, манзилдан чиқиб кетиш керак» деган ваҳима келтириб чиқарган.
Мазкур ваҳима сабаб 29 апрель, чоршанба куни, тонгги соат 04:00 ларда қишлоқда яшовчи бир гуруҳ фуқаролар оила аъзолари билан яшаш манзилини тарк этиб, тумандан чиқиб кетишга уринган ҳамда қишлоқ ҳудудида саросима, тартибсиз ҳолат юзага келган.
Ҳолатга ойдинлик киритиш мақсадида ҳуқуқ-тартибот идоралари томонидан суриштирув ҳаракатлари олиб борилган. Ҳамда аҳоли ўртасида ваҳима уйғотган шахслар аниқланган. Ваҳимачи фуқаролар хатти-ҳаракатидан пушаймон бўлиб, тумандошларидан кечирим сўраган.
Таъкидланишича, асоссиз ва ёлғон хабар тарқатган икки шахсга нисбатан Маъмурий жавобгарлик тўғрисидаги кодекснинг 54-моддаси (эпидемияга қарши кураш қоидаларини бузиш)га асосан маъмурий баённома расмийлаштирилган.
Эслатиб ўтамиз, 2020 йил 28 апрель куни «Қоракўл ва Олот туманини сув босади» деган норасмий ва асоссиз хабар тарқатган шахслар аниқланиб, уларга нисбатан ҳам маъмурий баённома расмийлаштирилган эди.
Изоҳ (0)