Buxoro shahrida joylashgan Xo‘ja Kalon masjidi oldidagi hovuz Madaniyat vazirligi huzuridagi Madaniy meros departamentining tegishli ruxsatsiz buzilgani va u yerda ta’mirlash ishlari olib borilgani haqida avvalroq xabar berilgan edi. Mazkur ta’mirlash ishlari aks etgan suratlar ijtimoiy tarmoqlarda tarqalgan edi.
Buxoro viloyati Madaniy meros boshqarmasi tomonidan “Daryo”ga ma’lum qilinishicha, Gavkushon ko‘chasidagi ushbu Xo‘ja Kalon hovuzi 2001-yil mazkur hududda olib borilgan rekonstruksiya ishlari davomida topilgan va o‘sha yilning o‘zida qayta restavratsiya qilingan.
Ta’kidlanishicha, dinamik ta’sirlar natijasida hovuz g‘ishtlarida cho‘kish va eskirishlar kuzatilgani bois ayni paytda hovuz qayta rekonstruksiya qilinmoqda. Shuningdek, Buxoroning Eski shahar qismidan oqib o‘tuvchi Shohrud arig‘i ham qayta rekonstruksiya asosida milliy zamonaviy ko‘rinishga keltiriladi, deya ma’lum qildi Buxoro viloyat Madaniy meros boshqarmasi mas’ul xodimi Bahrom Huseynov.
Buxoro shahar hokimligining “Daryo”ga bergan ma’lumotiga ko‘ra, O‘zbekiston Prezidenti Shavkat Mirziyoyev 2019-yilning 29-30-mart kunlari Buxoro viloyatiga amalga oshirgan tashrifi chog‘ida mazkur hududda ta’mirlash ishlarini olib borish bo‘yicha ko‘rsatma bergan. Xususan, mazkur tashrif davomida bo‘lib o‘tgan yig‘ilishda Buxoro shahrining Eski shahar qismida turistik yo‘nalish bo‘yicha hududni obodonlashtirish va barcha muhandislik tarmoqlarini rekonstruksiya qilish bo‘yicha topshiriq berilgan.
Izoh (0)