Bosh vazir o‘rinbosari — iqtisodiy rivojlanish va kambag‘allikni qisqartirish vaziri Jamshid Qo‘chqorov hamda moliya vaziri Timur Ishmetov iqtisodchi Bekzod Hoshimov bilan suhbat davomida O‘zbekiston hukumati koronavirus pandemiyasi sharoitida aholiga qanday moddiy ko‘mak berish variantlarini ko‘rib chiqayotganini so‘zlab berdi.
Moliya vaziri Timur Ishmetov hozirgi inqiroz holati alohida bir shaxs yoki hukumatning aybi bilan yuzaga kelmaganini ta’kidlab, dunyoning ko‘plab davlatlari insonlar hayotini saqlab qolish uchun “iqtisodiyotni to‘xtatishga” majbur bo‘layotganini bildirdi.
“15-mart kuni (O‘zbekistonda koronavirus bilan kasallangan ilk bemor qayd etilganida) o‘tkazilgan yig‘ilishda ushbu masala ko‘tarildi. O‘sha vaqtda o‘zim ham buni qachon amalga oshirish kerak, degan savolga javob bera olmadim. 15-mart kuni biz iqtisodiyotni qanchaga to‘xtatishimizni, qanday cheklovlargacha borishimizni bilmas edi. Kundan kunga vaziyatdan kelib chiqib, uni qat’iylashtira bordik”, — deydi moliya vaziri.
Ishmetovning ta’kidlashicha, davlatning asosiy maqsadi — aholini himoya qilish va qo‘llab-quvvatlash. Bu Prezidentning ota-onalarga beriladigan nafaqa va boshqa inqirozga qarshi choralariga oid ikkita farmonida ham o‘z aksini topdi. Shuningdek, banklarga korxonalar o‘z ishchilarga ish haqini to‘lashi uchun kreditlar bilan ta’minlanishini tashkil etish topshirildi.
“Biz karantin sabab uyda qolayotgan aholiga moddiy yordam ko‘ratish zarurligi to‘g‘risidagi fikrga allaqachon kelib bo‘lganmiz. Ha, buning budjetga ta’sirini ham hisob-kitob qilish kerak, biroq bu ikkinchi darajali masala. Birinchi navbatda — ijtimoiy masala”, — deydi Timur Ishmetov.
Moliya vazirining ta’kidlashicha, yordam pullarini har bir oilaga tarqatish kerak.
“O‘ylashimcha, ushbu pullarni odamlarning bankdagi hisob raqamiga, ya’ni plastik kartasiga tashlab berish kerak. Boshqa yo‘lni ko‘rmayapmiz. Ikkinchidan, bir oila prinsipiga asoslanish kerak. Ya’ni pullarni alohida shaxsga emas, oilaga uning kattaligidan kelib chiqib tarqatish lozim. Ishsizlar va daromadidan ayrilganlarning asosiy qismi xususiy sektorda, chunki davlat sektori mablag‘ olishni davom etmoqda. Bank kartasi bo‘lmasa, uni ochish va o‘shaning ichiga pul tashlab berish kerak”, — deydi moliya vaziri.
Izoh (0)