Zafar Hoshimov O‘zbekistonda tadbirkorlikni tartibga soluvchi hujjatlarni soddalashtirish kerakligini aytdi

O‘zbekistonning turli hududlarida faoliyat olib boruvchi “Korzinka.uz” supermarketlar tarmog‘i asoschisi va rahbari Zafar Hoshimov mamlakatda tadbirkorlikni tartibga soluvchi hujjatlarni soddalashtirish kerakligini aytdi. Tadbirkor bu haqda “MFaktor” loyihasiga bergan intervyusida gapirgan.

Zafar Hoshimov mamlakatda tadbirkorlikni rivojlantirish masalalariga to‘xtalib, byurokratiya haqida gapirgan.

“Tadbirkorlikni tartibga soluvchi turli qonun va qonunosti hujjatlari bor. Hozir mutasaddi davlat tashkilotlari ularni iloji boricha soddalashtirishi kerak. Masalan, savdo, sertifikatlashtirish qoidalari va boshqalar. Bularning hammasi — biznes uchun tranzaksion xarajatlarni oshiradigan narsalar. Tranzaksion xarajatlarni pasaytirish ustida davlat muassasalari, deputatlar, kengashlar ishlasa, juda ham yaxshi bo‘lardi.

Bu narsa deyarli katta pul talab qilmaydi, lekin haqiqatan ham davlatga foydasi, yo zarari bo‘lmagan ba’zi rasmiyatchilik, hisobotlar bor. Shu narsalarga hozir barham bersak, maqsadga muvofiq”, — deb ta’kidlagan Zafar Hoshimov.

Uning qayd etishicha, biznesni yuritish sohasidagi ko‘plab tizimlarni elektronlashtirish kerak.

Xususan, tadbirkorning fikricha, soliq hisobotini onlayn berish mumkin. Bundan tashqari har kuni beriladigan qog‘oz ishonchnoma, yuk xatini elektronlashtirish va elektronlashtirilgan tizimlarga o‘tkazish zarur.

Zafar Hoshimov Jahon savdo tashkilotiga kirishni tadbirkorlar uchun keng imkoniyat deb hisoblaydi. Uning fikricha, favqulodda holatdan foydalanib, Jahon savdo tashkilotiga tezroq kirish lozim.

Tadbirkorning fikricha, sertifikatlashtirish tizimida yengilliklar berilishi kerak.

“Sertifikatlashtirish borasida anchadan beri shikoyatlarim bor. Qaysi ma’noda? Davlat shu mahsulotning zararli yoki zararsizligini yetkazib bersa bo‘ladi. Uning sifatini bozor aniqlaydi. Kimningdir juda sifatli narsaga puli yetmasligi mumkin. Lekin shu mahsulot zararsiz bo‘lsa, bo‘ldi. Mahsulot zararli bo‘lmasa, turli bahonalar bilan uni sertifikatlamaslik va shunga o‘xshagan narsalarda yengillik berish kerak. Bunday o‘zgarishlar aholiga ham, tadbirkorlarga ham yengilliklar beradi”, — dedi Hoshimov.

Avvalroq Zafar Hoshimov Prezidentning koronavirus masalasida o‘tkazgan videoselektorda nimalardan ta’sirlanganini aytgan edi.