Амстердамдаги цирк шоуси чоғида 10 метрли баландликдан қулаган ўзбекистонлик ҳаво гимнастикачиси Кристина Воробёва соғаймоқда. Бироқ саломатлигининг тўлиқ тикланиши учун яна икки йил керак бўлади. Бу ҳақда унинг физиотерапевти берган маълумотларга асосланиб, Hart van Nederland хабар берди.
Акробатнинг физиотерапевти Мирейл Понтнинг маълум қилишича, унинг реабилитацияси жуда интенсив ўтди. Шифохонага келганида у ҳеч нарса қила олмас эди. У фақат оёқларини қимирлата оларди. Кристина Воробёва апрель ойи охирида қўлтиқтаёқ ёрдамида юра олиши кутилмоқда. Охир-оқибат бемор ёрдамсиз юра олиши мумкин бўлади, аммо тўлиқ тикланиши учун яна икки йил керак.
Акробатнинг яна чиқиш қила олиши масаласида Мирейл Понт «у дунё миқёсидаги ҳаво гимнастикачиси эди. Ўша даражага қайтиши мен учун имконсиз кўринади, аммо ким билади, у бизни ҳайратга солиши мумкин», деб таъкидлаган.
Эслатиб ўтамиз, ўзбекистонлик акробатлар Кристина Воробёва ва Рустам Османов 2020 йилнинг 3 январь куни Амстердамдаги Карре театридаги ўзининг Sky Angels («Осмон фаришталари») дуэт чиқиши пайтида 10 метр баландликдан қулаб тушган эди. Воробёва орқа томони билан йиқилиб, жиддий жароҳат олган. Унинг жуфти Рустам Османов эса енгилроқ жароҳат олган эди. Мазкур вазият юзасидан Ўзбекистон Ташқи ишлар вазирлиги ва Маданият вазирлиги маълумот берганди. Кейинроқ Кристина Воробёванинг ўзи аҳволи ҳақида хабар берганди, у бир нечта марта операция қилинди.
Изоҳ (0)