Toshkent shahar Yunusobod tumanida elektr energiyasi iste’moli bo‘yicha tajriba tariqasida o‘rnatilgan bazaviy me’yorlar bekor qilindi. Bu haqda Energetika vazirligi xabar berdi.
Eslatib o‘tamiz, Elektr energiyasi iste’moli bo‘yicha bazaviy me’yorlar Yunusobod tumanida tajriba tariqasida 2019-yil 1-yanvardan joriy qilingandi. Unga ko‘ra, bitta abonent uchun oylik iste’mol miqdori 300 kilovatt soatni tashkil etardi. Belgilangan normadan oshib ketadigan energiya koeffitsienti uchun esa to‘lov tarif narxining 1,2 baravarini tashkil etishi belgilangandi.
Koronavirus sababli joriy etilgan karantin tufayli 24-mart kuni ushbu tajriba loyihasi bekor qilinishi ma’lum qilingandi.
Energetika vazirligi Adliya vazirligi va Moliya vazirligiga Yunusobod tumani aholisi uchun joriy etilgan elektr energiyasi iste’molining bazaviy me’yorlarini bekor qilish to‘g‘risida so‘rov jo‘natgandi. Moliya vazirligidan 2020-yil 25-martda olingan javobga muvofiq, Yunusobod tumanida elektr energiyasi iste’molining bazaviy me’yorini yuritish bekor qilindi.
Qayd etilishicha, bunday qaror koronavirus sababli joriy etilgan karantin bilan bog‘liq. Karantin sababli ko‘plab kishilar vaqtini uyda o‘tkazadi va shunga mos ravishda energiyani ko‘p sarflaydi. O‘rnatilgan bazaviy me’yorlar esa tuman aholisi uchun boshqa tumanlar aholisi bilan teng bo‘lmagan holatni yuzaga keltirardi. Endilikda barcha abonentlarga elektr energiyasi uchun haq to‘lashda teng sharoitda bo‘lish imkoniyati yaratildi.
Izoh (0)