Rossiya—Qozog‘iston chegarasida 2 nafar o‘zbekistonlik yuk mashinasi haydovchisida koronavirus aniqlandi

Rossiya—Qozog‘iston chegarasida yuk mashinasida ketayotgan 2 o‘zbekistonlikda koronavirus aniqlandi, deb xabar bermoqda “Xabar24”. Ular G‘arbiy Qozog‘istondagi Sirim chegara postidan o‘tib ketmoqchi bo‘lgan.

Har ikkovining tana harorati yuqori ekanligi qayd etilgan. Haydovchilar gospitalga olib ketilib, COVID-19 uchun tahlil olingan va uning natijalari ijobiy chiqqan.

Azattyq Rýhy’ning Qozog‘iston prezidenti huzuridagi favqulodda holatni ta’minlash bo‘yicha davlat komissiyasining tezkor shtabiga tayanib xabar berishicha, ular 25 va 27 yoshli fuqarolar bo‘lib, yuk tashish bilan shug‘ullanib kelgan. Ayni paytda ular viloyat yuqumli kasalliklar shifoxonasiga o‘tkazilgan bo‘lib, sog‘lig‘i qoniqarli ahvolda.

Qayd etilishicha, Sirim chegara postidan har kuni 300 ta avtomobil o‘tadi. Ushbu hududdagi dastlabki ikki holat 29-mart kuni aniqlangan.

“Ular hech kim bilan aloqada bo‘lmagan. Birinchisi bizning epidemiologlar bo‘ldi, lekin ular butunlay himoya kiyimlari, niqob, tibbiy qo‘lqoplarda edi. Umumiy hisobda bizda 4 ta holat aniqlandi, oxirgi ikki holatni olsak, chetdan kelgan hisoblanadi”, — deydi G‘arbiy Qozog‘iston viloyati Tovarlar va xizmatlar sifati va xavfsizligini nazorat qilish departamenti rahbari Muhamgali Arispayev.

Ayni paytda Qozog‘istonda koronavirus bilan kasallanganlar soni 802 kishiga, qurbonlar soni esa 9 kishiga yetdi. O‘zbekistonda esa koronavirusga chalinganlar soni 624 kishini tashkil qilmoqda.