Navoiyda karantin vaqtida qimorxona tashkil qilgan fuqaroga nisbatan jinoiy ish qo‘zg‘atildi
Navoiy viloyati Karmana tumanida karantin qoidalarini buzgan holda o‘z uyida qimorxona tashkil qilgan 50 yoshli fuqaroga nisbatan jinoiy ish qo‘zg‘atildi. Bu haqda Navoiy viloyati IIB xabar berdi.
Ma’lum qilinishicha, 2020-yilning 8-aprel kuni kechki payt Navoiy viloyati IIB xodimlari tomonidan olingan tezkor ma’lumotlarga asosan Karmana tumani hududida tezkor-profilaktik tadbir o‘tkazilgan. Tadbir davomida Navoiy viloyati Karmana tumani Kalovot MFYda istiqomat qiluvchi 1960-yilda tug‘ilgan F.M. o‘z xonadonida qimorxona tashkil etgani aniqlangan.
Bundan tashqari, F.M. o‘yinga 4 nafar tanishi — P.B., A.J., O.E. hamda V.Sh.ni jalb etgan holda, karantin qoidalarini buzgani aniqlangan. Ular pul evaziga qimor o‘ynash jarayonida daliliy ashyolar bilan qo‘lga olingan.
Ma’lum qilinishicha, qimor o‘yini davrasida tikilgan umumiy qiymatdagi 3 712 500 so‘m pul mablag‘i hamda 7 dona o‘yin qartalari daliliy ashyo sifatida hujjatlashtirib olingan. Shuningdek, V.Sh. boshqaruvida bo‘lgan Damas avtomashinasi jarima maydonchasiga joylashtirilgan.
Mazkur holat yuzasidan o‘z xonadonida qimorxona tashkil etganligi sababli, F.M. Jinoyat kodeksining 278-moddasi (Qimor va tavakkalchilikka asoslangan boshqa o‘yinlarni tashkil etish hamda o‘tkazish) asosida, qimor o‘yinining ishtirokchilari bo‘lgan P.B., A.J., O.E. hamda V.Sh. Ma’muriy javobgarlik to‘g‘risidagi kodeksning 191-moddasi (Qimor va tavakkalchilikka asoslangan boshqa o‘yinlar) hamda 54-moddasiga (Epidemiyalarga qarshi kurash qoidalarini buzish) asosan tegishli tartibda javobgarlikka tortildi.
Avvalroq Navoiyda karantin vaqtida o‘z uyini diskotekaga aylantirgan yoshlar jarimaga tortilgani hamda Uchquduqda karantin qoidalarini buzib, oltin qazish bilan ruxsatsiz shug‘ullangan 26 kishi ushlangani haqida xabarlar berilgan edi.
