Qozog‘iston poytaxti Nur-Sulton va mamlakatning eng yirik shahri Olmaotada koronavirus infeksiyasining tarqalish xavfi sababli yangi cheklovlar joriy etiladi. Bu haqda “RBK” xabar berdi.
Ma’lum qilinishicha, shahar aholisi o‘z uylarini faqat oziq-ovqat yoki dori sotib olish hamda ishga borish uchun tark etishi mumkin. Barcha jamoat joylari, shu jumladan, parklar, o‘yin maydonchalari va sohillar yopiq bo‘ladi. Voyaga yetmaganlar kattalarsiz ko‘chada harakatlana olmaydi. Shahar ko‘chalarida uch kishidan ortiq odamning to‘planishiga yo‘l qo‘yilmaydi. Taqiq faqat oila a’zolariga ta’sir qilmaydi. Mazkur choralar 28-mart, shanba kuni, yarim tundan boshlab kuchga kiradi.
Qozog‘iston Nur-Sulton va Olmaota shaharlarida 17-mart kunidan kasallik tarqalishining oldini olish uchun karantin e’lon qildi. Kechasi jamoat transporti to‘xtatiladi, yirik savdo markazlari va nooziq-ovqat do‘konlar yopildi, shaharlar sektorlarga ajratildi va unga bog‘liq ravishda aholining harakati cheklandi.
Qozog‘istonda koronavirusga chalinganlar soni 97 nafarga yetdi, ulardan 55 nafari Nur-Sultonda va 34 nafari Olmaotada qayd etilgan.
Qozog‘istonda ommaviy tadbirlar bekor qilindi, maktab o‘quvchilari ta’tilga ertaroq chiqdi, davlat organlariga xorijga xizmat safariga chiqish taqiqlandi. Fuqarolarga qo‘l berib ko‘rishmaslik tavsiya qilindi.
Mamlakatda koronavirus tarqalishi munosabati bilan 16-martdan 15-aprelga qadar favqulodda holat rejimi joriy qilindi. Bu davrda qozog‘istonliklar mamlakatni tark eta olmaydi
Izoh (0)