“Ijtimoiy fikr”: O‘zbekistonliklarning 75 foizdan ortig‘i koronavirus haqida xabardor

“Ijtimoiy fikr” respublika jamoatchilik fikrini o‘rganish Markazi monitoring rejimida mamlakat fuqarolarining COVID-19 koronavirus infeksiyasi to‘g‘risida xabardorlik darajasini aniqlash va O‘zbekistonda koronavirus tarqalishiga yo‘l qo‘ymaslik bo‘yicha ko‘rilayotgan chora-tadbirlarning samaradorligi to‘g‘risida o‘zbekistonliklarning fikrini o‘rganish maqsadida telefon so‘rovlarini o‘tkazdi.

Ikki bosqichda o‘tkazilgan tadqiqotda (I bosqich — 26-fevraldan 2-martgacha, II bosqich — 16—20-mart kunlari) mamlakatning barcha mintaqalarida yashovchi, 18 va undan katta yoshdagi erkaklar va ayollar, yoshlar va kattalar ishtirok etdi.

Telefon so‘rovi davomida aniqlanishicha, fuqarolarning 75,4 foizi koronavirus infeksiyasi to‘g‘risida yetarlicha, to‘la darajada xabardor, so‘rovning har beshinchi ishtirokchisi “nimalarnidir eshitganini, lekin batafsil bilmasligini” bildirgan.

So‘rov ishtirokchilarining aksariyat qismi (93,9 foizi) infeksiya havo-tomchi yo‘llari va kasallangan odam  tegingan predmetlar orqali yuqishidan xabardor bo‘lgan.

Koronavirus haqida xabarlarning asosiy manbasi televideniye bo‘lib qolmoqda — respodenlarning har ikkitadan bittasi (53,6 foizi) virusga oid ma’lumotlardan Milliy teleradiokompaniya dasturlari orqali boxabar bo‘lgan. 29,7 foiz respondent COVID-19 haqida ma’lumotlarni internetdan o‘qigan.

“O‘zbekiston OAVlarida koronavirus infeksiyasi haqida yetarlicha ma’lumot berilayaptimi?” degan savolga so‘rov ishtirokchilarining mutlaq ko‘pchiligi — 92 foizi ijobiy javob bergan.

Aniqlanishicha, ishtirokchilarning 68,1 foizi davlatning koronavirus infeksiyasidan ogohlantirish, uni aniqlash va kasallikning tarqalishiga chek qo‘yishga yo‘naltirilgan chora-tadbirlarini ijobiy baholaydi. 13,8 foizi esa ko‘rilayotgan choralar yetarli emas deb hisoblagan.

Mintaqaviy kesimda koronavirus infeksiyasining tarqalishiga yo‘l qo‘ymaslik bo‘yicha qabul qilinayotgan chora-tadbirlar yuzasidan fuqarolarning yuqori baholari Qoraqalpog‘iston Respublikasida (85,7 foiz), Jizzax (81,3 foiz), Navoiy (81,3 foiz) va Sirdaryo viloyatlarida (76,9 foiz) aniqlangan, ushbu hududlarda ularning mintaqalarida zarur barcha chora-tadbirlar ko‘rilayapti, deb hisoblovchilar soni mamlakat bo‘yicha o‘rtacha ko‘rsatkichdan yuqori.