Buxoroda 81 yil oldin ishlab chiqarilgan qurolni ruxsatnomasiz saqlab kelgan shaxsga jinoyat ishi qo‘zg‘atildi

Ishlab chiqarilganiga 81 yil bo‘lgan qurolni noqonuniy saqlab kelgan buxorolik fuqaroga nisbatan jinoyat ishi qo‘zg‘atildi.

Bu haqda “Daryo”ga xabar bergan Buxoro IIB terrorizm va ekstremizmga qarshi kurashish boshqarmasi xodimi Halim Kamolovning ta’kidlashicha, holat “Tozalash-Antiterror” maxsus tadbiri davomida aniqlangan.

Ma’lum bo‘lishicha, Qorako‘l tumanidagi “Regehaydar” mahallasida yashovchi 27 yoshli fuqaro H.M. yashash uyida 1939-yil ishlab chiqarilgan bir nilli, IJ-5 modelli ov qurolini tegishli ruxsatnomasiz, noqonuniy tarzda saqlab kelgan.

Mazkur holat yuzasidan fuqaro H.M.ga nisbatan Jinoyat kodeksining 248-moddasi 1-qismi (Tegishli ruxsatnomasiz o‘qotar qurol, shuningdek, o‘q-dorilar, portlovchi moddalar yoki portlatish qurilmalari tayyorlash, olish, olib yurish, saqlash, olib o‘tish yoki jo‘natish) bilan jinoyat ishi qo‘zg‘atilgan.

Mazkur moddaga ko‘ra aybdor bazaviy hisoblash miqdorining ellik baravarigacha miqdorda jarima yoki ikki yildan besh yilgacha ozodlikni cheklash yoxud besh yilgacha ozodlikdan mahrum qilish bilan jazolanadi.