TIV O‘zbekiston fuqarolariga vatanga qaytish uchun davlat chegarasidan o‘tish taqiqlanmaganini ma’lum qildi

Tashqi ishlar vazirligi O‘zbekiston hududiga kirish uchun taqiqlar borasida qo‘shimcha ma’lumot va izoh berdi.

Respublika maxsus komissiyasi tomonidan qabul qilingan koronavirus tarqalishining oldini olish bo‘yicha vaqtincha cheklov choralari munosabati bilan O‘zbekiston Tashqi ishlar vazirligi quyidagilarni ma’lum qiladi:

“Xorijdagi O‘zbekiston fuqarolariga vatanga qaytish uchun davlat chegarasidan o‘tish taqiqlanmaydi. O‘zbekiston hududiga kirishga qo‘yilgan cheklovlar, avvalambor, boshqa davlatlarning fuqarolariga tegishli.

Shu bilan birga, davlatdan tashqariga chiqish bo‘yicha vaqtincha taqiq O‘zbekiston fuqarolariga tegishli bo‘lib, hozirda mamlakatimizda bo‘lib turgan xorijiy fuqarolarga nisbatan qo‘llanilmaydi”.

Bosh vazir Abdulla Aripov ishtirokidagi matbuot anjumanida ayolda koronavirus aniqlangach, uning 9 nafar oila a’zosi, shuningdek, reysning O‘zbekistonda qolgan yo‘lovchilari va ular bilan muloqotda bo‘lgan odamlar — jami 150 kishi izolyatsiyaga olingani aytilgan. 16-martdan boshlab xorijiy davlatlar bilan barcha aviareyslar bekor qilinib, avtotransport vositasida O‘zbekistonga kirish-chiqish to‘xtatiladi.

Hukumat O‘zbekistondagi diniy idoralarga diniy marosimlar o‘tkazishni vaqtincha cheklash bo‘yicha iltimos bilan murojaat qilgan, shuningdek, barcha sport (masalan, Superliga), madaniy (jumladan, konsert) va boshqa tadbirlar, shuningdek, Navro‘z tantanalari va u bilan bog‘liq boshqa ommaviy marosimlar ham bekor qilingan (lekin to‘ylarni o‘tkazish mumkin). Bosh vazir ishtirokidagi matbuot anjumanida bolalar bog‘chalari, o‘rta maktablar va oliy ta’lim muassasalari (davlatnikimi, xususiymi, farqi yo‘q) karantinga yopilishi ham aytilgan.