Normativ-huquqiy hujjatlar loyihalari muhokamasi portaliga Vazirlar Mahkamasining “Orol dengizi akvatoriyasi va unga tutash hududlarning neftgazlilik salohiyatini geologik jihatdan o‘rganish chora-tadbirlari to‘g‘risida”gi qarori loyihasi muhokama uchun joylashtirildi.
Hujjatda aytilishicha, O‘zbekiston Respublikasi Davlat geologiya va mineral resurslar qo‘mitasi va “Rosgeologiya” AJ o‘rtasida 2020-yil 27-fevralda yer qa’ridan foydalanish sohasida hamkorlik bitimi imzolangan.
“Rosgeologiya” AJ tomonidan bitim shartlarida belgilangan faoliyatni tashkil etish va amalga oshirish uchun O‘zbekiston Respublikasi rezidenti hisoblangan mas’uliyati cheklangan jamiyat shaklida operator tashkil etadi.
Belgilanishicha:
- O‘zbekiston Respublikasi Davlat geologiya va mineral resurslar qo‘mitasi bitimni amalga oshirish uchun mas’ul hisoblanadi va unga bitimda ko‘rsatilgan vazifalarni bajarish uchun “Rosgeologiya” AJ va uning bilan shartnoma tuzish huquqi beriladi;
- Bitim doirasida vazifalarni amalga oshirishni ta’minlash uchun mahalliy subpudratchilar ro‘yxati tasdiqlanadi. Ularga yangi neft va gaz konlarini ochish maqsadida Orol dengizi akvatoriyasi va unga tutash hududlarning neft va gaz salohiyatini baholash bo‘yicha bitim doirasida “Rosgeologiya” AJ va uning sho‘ba korxonalari bilan shartnomalar tuzish huquqi beriladi.
- O‘zbekiston Respublikasi Iqtisodiyot va sanoat vazirligi bitimni amalga oshirish bo‘yicha tarmoqlararo muvofiqlashtiruvchi organ vazifasini bajaradi.
- Orol dengizi akvatoriyasi va unga tutash hududlarning neftgazlilik salohiyatini geologik o‘rganish bo‘yicha “Yo‘l xaritasi” va reja jadvali tasdiqlanadi.
- O‘zbekiston Respublikasi Iqtisodiyot va sanoat vazirligi, O‘zbekiston Respublikasi davlat geologiya va mineral resurslar qo‘mitasi bitim doirasida amalga oshirilayotgan ishlarning samaradorligini muvofiqlashtirish va baholash bo‘yicha “Rosgeologiya” AJ mutaxassislarini qo‘shgan holda idoralararo ishchi guruhining tarkibi bo‘yicha Vazirlar Mahkamasiga taklif kiritadi.
- O‘zbekiston Respublikasi davlat geologiya va mineral resurslar qo‘mitasiga istisno tariqasida “Rosgeologiya” AJ va Operator bilan to‘g‘ridan to‘g‘ri tender o‘tkazmasdan shartnomalar tuzishga ruxsat beriladi.
- O‘zbekiston Respublikasi Moliya vazirligi, Iqtisodiyot va sanoat vazirligi va O‘zbekiston Respublikasi Davlat geologiya va mineral resurslar qo‘mitasi 2020-yil va keyingi yillarda mineral-xomashyo bazasini rivojlantirish va qayta tiklash davlat dasturi doirasida uglevodorod xomashyosi bo‘yicha geologiya qidiruv ishlari uchun xarajatlarni nazarda tutadi.
Izoh (0)