Орол денгизи ва унга туташ ҳудудларнинг нефтгазлилик салоҳияти ўрганилади

Норматив-ҳуқуқий ҳужжатлар лойиҳалари муҳокамаси порталига Вазирлар Маҳкамасининг «Орол денгизи акваторияси ва унга туташ ҳудудларнинг нефтгазлилик салоҳиятини геологик жиҳатдан ўрганиш чора-тадбирлари тўғрисида»ги қарори лойиҳаси муҳокама учун жойлаштирилди.

Ҳужжатда айтилишича, Ўзбекистон Республикаси Давлат геология ва минерал ресурслар қўмитаси ва «Росгеология» АЖ ўртасида 2020 йил 27 февралда ер қаъридан фойдаланиш соҳасида ҳамкорлик битими имзоланган.

«Росгеология» АЖ томонидан битим шартларида белгиланган фаолиятни ташкил этиш ва амалга ошириш учун Ўзбекистон Республикаси резиденти ҳисобланган масъулияти чекланган жамият шаклида оператор ташкил этади.

Белгиланишича:

• Ўзбекистон Республикаси Давлат геология ва минерал ресурслар қўмитаси битимни амалга ошириш учун масъул ҳисобланади ва унга битимда кўрсатилган вазифаларни бажариш учун «Росгеология» АЖ ва унинг билан шартнома тузиш ҳуқуқи берилади;
• Битим доирасида вазифаларни амалга оширишни таъминлаш учун маҳаллий субпудратчилар рўйхати тасдиқланади. Уларга янги нефть ва газ конларини очиш мақсадида Орол денгизи акваторияси ва унга туташ ҳудудларнинг нефть ва газ салоҳиятини баҳолаш бўйича битим доирасида «Росгеология» АЖ ва унинг шўъба корхоналари билан шартномалар тузиш ҳуқуқи берилади.
• Ўзбекистон Республикаси Иқтисодиёт ва саноат вазирлиги битимни амалга ошириш бўйича тармоқлараро мувофиқлаштирувчи орган вазифасини бажаради.
• Орол денгизи акваторияси ва унга туташ ҳудудларнинг нефтгазлилик салоҳиятини геологик ўрганиш бўйича «Йўл харитаси» ва режа жадвали тасдиқланади.
• Ўзбекистон Республикаси Иқтисодиёт ва саноат вазирлиги, Ўзбекистон Республикаси давлат геология ва минерал ресурслар қўмитаси битим доирасида амалга оширилаётган ишларнинг самарадорлигини мувофиқлаштириш ва баҳолаш бўйича «Росгеология» АЖ мутахассисларини қўшган ҳолда идоралараро ишчи гуруҳининг таркиби бўйича Вазирлар Маҳкамасига таклиф киритади.
• Ўзбекистон Республикаси давлат геология ва минерал ресурслар қўмитасига истисно тариқасида «Росгеология» АЖ ва Оператор билан тўғридан-тўғри тендер ўтказмасдан шартномалар тузишга рухсат берилади.
• Ўзбекистон Республикаси Молия вазирлиги, Иқтисодиёт ва саноат вазирлиги ва Ўзбекистон Республикаси Давлат геология ва минерал ресурслар қўмитаси 2020 йил ва кейинги йилларда минерал-хом ашё базасини ривожлантириш ва қайта тиклаш давлат дастури доирасида углеводород хом ашёси бўйича геология қидирув ишлари учун харажатларни назарда тутади.