UNESCO tomonidan e’lon qilingan ma’lumotlarga ko‘ra, hozirgi vaqtda koronavirus tufayli kuzatilayotgan inqiroz butun dunyoda 363 million o‘quvchi va talabani qamrab oldi. Bu haqda UNN xabar berdi.
Bunda 57,8 million nafar talaba, qolgani esa maktab yoshigacha bo‘lgan hamda maktab o‘quvchilari ta’lim olishdan uzilib qolgan.
Shu tarzda COVID-19 koronavirusi tufayli jahonda har beshinchi o‘quvchi maktabga, har to‘rtinchi talaba oliy o‘quv yurtiga bora olmayapti.
15 ta mamlakat hukumati barcha maktablarni, 14 ta mamlakat hukumati esa bir nechta maktablarni yopishga qaror qilgan.
Maktablar yopilishi Osiyo, Yevropa, Yaqin Sharq va Shimoliy Amerikada qayd etilgan.
“Biz ta’lim olishdan uzilib qolgan hududlarga kirib, mamlakatlar bilan ta’lim jarayonining uzluksizligini ta’minlash uchun yuqori texnologiyali, past texnologik va texnologik bo‘lmagan yechimlarni topish bo‘yicha ish olib boramiz”, — deydi UNESCO bosh direktori Odre Azule.
Ushbu holatga javoban dolzarb chora-tadbirlarni muvofiqlashtirish maqsadida UNESCO favqulodda guruh tuzilishini e’lon qildi.
UNESCO-COVID-19 deb nomlangan ushbu guruh milliy darajadagi chora-tadbirlarni qo‘llab-quvvatlaydi hamda chekka mamlakatlarga alohida e’tibor qaratadi.
Jahon sog‘liqni saqlash tashkilotining ma’lumotlariga ko‘ra, dunyo bo‘ylab koronavirus bilan kasallanganlar soni 113 ming kishidan oshib ketgan. Davolanishga muvaffaq bo‘lganlar 63 578 kishini tashkil etmoqda. Sog‘liqni saqlash vaziri Alisher Shodmonov esa O‘zbekistonga koronavirus kirib kelmaganini ma’lum qildi.
Avvalroq Turkiyada koronavirus bilan kasallanish bo‘yicha dastlabki holat qayd etilgani, Ozarbayjonda esa koronavirus tufayli Navro‘z bayrami tadbirlari bekor qilingani haqida xabar berilgan edi.
Izoh (0)