“Daryo”ni Telegram’da o‘qing! Join!
21:09, 09.03.2020 114577

“Daryo” oqshomi: Xitoy koronavirusi bo‘yicha 9-martning asosiy xabarlari

Kasallanganlar va vafot etganlar

Xitoy Milliy sog‘liqni saqlash komissiyasi mamlakatda COVID-19 koronavirusi qurbonlari soni 8-mart holatiga ko‘ra, 3119 kishiga yetgani haqida axborot berdi. O‘tgan bir sutka davomida Xitoyda 40 ta yangi kasallanish holati qayd etilgan, 22 bemor esa vafot etgan.

Xitoyning Sujchou shahrida koronavirus xavfi tufayli 14 kun karantinga olingan ayol Chen Yunpinni tibbiyot xodimlari tug‘ilgan kuni bilan tabrikladi.

Foto: Getty Images

Shu kunga qadar infeksiyadan 1535 kishi tuzalib, kasalxonadan javob berilgan. Xitoyda epidemiya boshlaganidan buyon koronavirusga chalinganlarning umumiy soni 80 735 kishiga yetgan. Jami 58,6 ming bemor tuzalgani aytilmoqda. Shuningdek, yuz yoshli qariya koronavirusdan davolanishga muvaffaq bo‘lgani ma’lum bo‘ldi. Shu kunga qadar, otaxon ushbu kasallikdan davolanishga muvaffaq bo‘lgan eng keksa bemor bo‘lib qolmoqda.

Jahon sog‘liqni saqlash tashkiloti yangi turdagi koronavirus bilan kasallanish holatlari jahon bo‘yicha 105 ming kishidan oshib ketgani, koronavirus allaqachon 102 mamlakatda qayd qilingani haqida xabar berdi. So‘nggi bir necha sutka davomida koronavirus infeksiyasi bilan kasallanish holatlari BolgariyaKosta-RikaMoldovaFransuz GvianasiMaldiv orollariMalta, Farer orollari, Martinika, shuningdek, Albaniyada aniqlandi.

Foto: “RIA Novosti”

Janubiy Koreyada koronavirusga chalinganlar soni 7,4 ming kishiga yaqinlashdi. Koronavirus bemorlarining kamida 4,5 ming nafari (62,8 foizi) Sinchonji sektasiga aloqador odamlardir.

Italiya koronavirusdan o‘lim holatlarining foiz ko‘rsatkichi bo‘yicha jahonda birinchi o‘rindagi mamlakatga aylandi. Shuningdek, mamlakatning Pyemont viloyati hokimi koronavirus yuqtirib olgani haqida xabarlar paydo bo‘lgan. Italiya Qurolli kuchlari bosh shtabi boshlig‘ida koronavirus aniqlandi. Bu haqda Bosh shtab boshlig‘i shaxsan o‘zi ma’lum qilgan.

Foto: “Trend.az”

Portugaliya prezidenti Marselu Rebelu de Souza koronavirus sabab ikki haftaga mo‘ljallangan tadbirlarni bekor qilib, ko‘ngilli ravishda karantinga ketishga qaror qildi. Ta’kidlanishicha, prezident biroz muddat oldin COVID-19 koronavirusi aniqlangani sabab yopilgan maktabning bir guruh o‘quvchilari bilan uchrashgan.

Hindistonda uch yoshli bolada koronavirus aniqlandi. Bolaning oilasi Italiyada bo‘lib qaytganidan so‘ng karantinga olingandi.

O‘zbekistondagi vaziyat

COVID-19 koronavirusi tarqalishining oldini olish maqsadida Turkmaniston va Eron o‘rtasidagi chegara yopilishi sababli 700 ga yaqin haydovchi, jumladan, 11 nafar O‘zbekiston fuqarosi “Lutfobod” va “Saraxs” chegara nazorat-o‘tkazish punktlarida qolib ketdi. Tashqi ishlar vazirligi elchixonaning konsullik bo‘limi 23-fevraldan buyon mazkur fuqarolar bilan doimiy aloqada bo‘lib kelayotganini ma’lum qilgan. Chegarada qolib ketgan o‘zbekistonliklar Shavkat Mirziyoyevdan yordam so‘rab unga videomurojaat yo‘llagan.

O‘zbekistonda koronavirus sabab xalqaro tadbirlar va sport musobaqalarini o‘tkazish vaqtincha to‘xtatildi. Shuningdek, xalqaro musobaqalarda O‘zbekiston terma jamoa a’zolarining ishtiroki hamda xorijiy xizmat safarlari vazirlik bilan kelishilgan holda amalga oshirilishi belgilab qo‘yildi.

Foto: Bukhara News

Uzbekistan Airways koronavirus tarqalgani tufayli Umra safarini amalga oshirayotgan 244 nafar o‘zbekistonlik ziyoratchini charter reys bilan Saudiya Arabistonidan olib ketdi.

Ma’lumot uchun, Milliy aviakompaniya 27-fevraldan boshlab Toshkentdan Jidda va Madinaga bo‘lgan barcha qatnovlarni vaqtinchalik to‘xtatgan edi. Bunga 25 ta davlat, jumladan, O‘zbekistondan kelgan turist va ziyoratchilarning Saudiya Arabistoniga kirishi vaqtinchalik man etilgani sabab bo‘lgan.

O‘zbekistonda xitoylik sayyohlar soni keskin kamaydi. Xitoydan 705 nafar sayyoh tashrif buyurdi. Turizmni rivojlantirish davlat qo‘mitasi ma’lumotlariga ko‘ra, bu 2019-yilning fevral oyidagi ko‘rsatkichdan 72,5 foizga kam (taqqoslash uchun, 2020-yil yanvar oyida ko‘rsatkichlar yaxshiroq va umidbaxsh edi).

JSSTning koronavirus bo‘yicha ekspertlari O‘zbekistondagi vaziyatga baho berdi“O‘zbekistonda ushbu infeksiyaga qarshi barcha choralar ko‘rilmoqda”, — degan Jahon sog‘liqni saqlash tashkilotining koronavirusga tayyorgarlik bo‘yicha yetakchi konsultanti Ute Enderleyn.

Jahondagi vaziyat

Xitoy Sog‘liqni saqlash ishlari bo‘yicha davlat qo‘mitasi koronavirus eng kamida 2020-yilning iyun oyiga qadar tarqalishda davom etishini e’lon qildi. Mutaxassisning so‘zlariga ko‘ra, virus tarqalishining oldini olish uchun chegaralarda sanitar nazoratni kuchaytirish hamda epidemiya tarqalgan xorijiy mamlakatlardan kirib kelayotganlar uchun qat’iy karantin siyosatini belgilash zarur.

Foto: “RBK”

Apple rahbari koronavirus tufayli ishchilarga uydan ishlashga ruxsat berdi. Ushbu qoida kompaniyaning koronavirus yuqtirish holatlari eng ko‘p qayd etilgan hududlariga nisbatan tatbiq etiladi.

Xitoyning Uxan shahridagi ko‘rgazma markazlari va stadionlarda tashkil etilgan 14 ta vaqtinchalik gospitalning 11 tasi bemorlarning uyga javob berilishi munosabati bilan yopildi.

Biroq xitoylik olimlar Uxan shifoxonasida 89 nafar bemorni ikki guruhga bo‘lib o‘rganib, koronavirus alomatlarida o‘zgarish borligini aniqladi.

Facebook va Instagram tibbiy niqoblar reklamasini taqiqlamoqchi. Bu borada yaqin kunlarda tegishli choralar ko‘rilishi ma’lum qilingan.

Foto: Getty Images

JSST koronavirusning yozda butunlay yo‘q bo‘lib ketishi haqidagi xabarlar yolg‘onligini ma’lum qildi. “Virusning tarqalish xususiyati saqlanib qolishi mumkinligini tan olishimiz lozim”, — degan tashkilotning sog‘liqni saqlash sohasidagi favqulodda vaziyatlar bo‘yicha ijrochi direktori Maykl Rayan.

Har kuni kechqurun faqat bitta xabar jo‘natamiz. “Daryo” oqshomi — kun davomida ro‘y bergan barcha voqea-hodisalar dayjesti Telegram-kanali: @daryooqshomi

Izoh qoldirishdan avval, qoidalar bilan tanishib oling: http://dy.uz/QbkeZ

Boshqa yangiliklar