O‘zbekistonga 2020-yilning fevral oyida Xitoydan 705 nafar sayyoh tashrif buyurdi. Turizmni rivojlantirish davlat qo‘mitasi ma’lumotlariga ko‘ra, bu 2019-yilning fevral oyidagi ko‘rsatkichdan 72,5 foizga kam (taqqoslash uchun, 2020-yil yanvar oyida ko‘rsatkichlar yaxshiroq va umidbaxsh edi).
Xitoylik sayyohlar soni koronavirus infeksiyasi tarqalayotgan bir vaqtda kamaygan. Xitoy fuqarolari uchun 2019-yil oxirida joriy etilgan vizasiz tartib hamon amalda, biroq ikki davlat o‘rtasida to‘g‘ridan-to‘g‘ri reyslar yo‘q — fevral oyi boshida Uzbekistan Airways Xitoy (Pekin va Urumchi)ga muntazam reyslarni vaqtincha to‘xtatgan edi.
Spot’ning qayd etishicha, Xitoy O‘zbekistonning sayyohlik industriyasida muhim o‘rin tutadi. Masalan, 2019-yilda O‘zbekistonga 61,9 ming nafar xitoylik tashrif buyurgan — bu uzoq xorij mamlakatlaridan kelgan sayyohlar soni bo‘yicha ikkinchi eng yaxshi ko‘rsatkich.
O‘zbekiston koronavirus epidemiyasi sabab xitoylik sayyohlarning bir qismini yo‘qotishi, biroq ularning o‘rnini boshqa davlatlardan keladigan sayyohlar hisobiga to‘ldirishi mumkinligi ta’kidlangan edi. Mahalliy turistik biznes ham shundan umidvor, biroq kasallikning jahon bo‘ylab faol tarqalayotgani bu rejalarni amalga oshirishga xalal bermoqda. Mavzuga doir:- Turoperatorlar koronavirus tufayli O‘zbekistonda soliq ta‘tili e‘lon qilishni taklif qildi
- Vazirlar Mahkamasida koronavirusning turizmga ta‘siri muhokama qilindi
- The Telegraph O‘zbekistonni koronavirusdan xoli davlatlar qatoriga kiritdi
- O‘zbekiston dunyoda koronavirus tarqalgani tufayli taxminan bir milliard dollar yo‘qotishi mumkin
