19-fevral kuni tunda Germaniyaning Xanau shahridagi ikkita tumanda otishma sodir bo‘ldi. Qurollangan jinoyatchi tungi soat o‘nlar atrofida shahar markazidagi Midnight chilimxonasiga hujum uyushtirgan. Guvohlar sakkiz yoki to‘qqizta o‘q ovozini eshitganliklarini bildirgan. Jinoyatchi ushbu chilimxonadan chiqib, avtomobilda dastlabki joydan ikki kilometr uzoqlikdagi Kesselshtadt tumani tomon yo‘l olgan. U yerda Arena Bar & Cafe chilimxona-barining ikki nafar mijoziga o‘q uzgan.
Hujum uyushtirgan erkak chilimxonalarda to‘qqiz nafar odamni o‘ldirgan va yana to‘rt nafar mijozni yaralagan, deyiladi politsiya ma’lumotida. Bild nashrining yozishicha, birinchi chilimxonada besh nafar odam halok bo‘lgan, ular orasida kurdlar ham bor. Hali rasman ma’lum qilingani yo‘q, biroq DPA bergan xabarga ko‘ra, hujum oqibatida yana bir nechta xorijliklar halok bo‘lgan. Deutsche Welle’ga ko‘ra, o‘lganlarning uch nafari bir vaqtlar Turkiyadan kelganlar, yana besh nafari — Shimoliy Afrikadan kelib Germaniyada yashayotgan fuqarolar bo‘lgan.
https://twitter.com/i/status/1230241824092102658
Gumonlanuvchi o‘z onasini ham o‘ldirgan va o‘z joniga suiqasd qilgan. Otishmadan yetti soat o‘tgach politsiya maxsus operatsiya o‘tkazib, ikkinchi chilimxona yaqinida joylashgan uyda uni o‘lik holda topgan. Xonadondan gumonlanuvchining murdasi, shuningdek uning 72 yoshli onasining jasadi toilgan. Politsiya vakillari ushbu jinoyat ishi yuzasidan boshqa gumonlanuvchilarni izlamayotganini ma’lum qilgan.
Spiegel nashri Germaniya politsiyasining Xanauda gumonlanuvchi Tobias R.ning otasini hibsga olganini xabar qilgan. Xabarga ko‘ra, Tobiasning otasi murdalar topilgan uyda vaqtincha qamoqqa olingan. RedaktionsNetzwerk Deutschland (RND) mediaguruhining qayd etishicha, jinoyatchi foydalangan qurol Glok pistoleti bo‘lib Tobias R. uni 2014-yilda Internet do‘kondan xarid qilgan.
Germaniya hukumati Xanaudagi hujumga terakt deb baho bergan. Gessen ichki ishlar vaziri Peter Boyt jinoyatchi o‘nglar ekstremistik ta’siriga tushib qolgani tufayli ushbu tajovuzkor harakatlarni sodir etgan deb hisoblamoqda. Jinoyatda irqchilik alomatlari mavjud, chunki otilganlarning aksar qismi xorijliklar, degan Bavariya ichki ishlar vaziri Yoahim Xerman. Germaniya kansleri Angela Merkel irqchilik va nafrat jamiyat kushandasi ekanini qayd etgan. Turkiya hukumati ushbu otishmani “rasistlik ruhidagi hujum” deb atagan.
Ommaviy qotillikni sodir etganlikda 43 yoshli fuqarodan gumon qilinmoqda. U avval politsiya e’tiboridan chetda, ko‘zga tashlanmay yashagan. Hessenschau nashrining yozishicha, jinoyatchi qurol olib yurish huquqiga ega bo‘lgan va quroldan o‘q otish sport turi bilan shug‘ullangan. Nemis OAV xabarlarida, uning ismi Tobias ekani familiyasi esa R. harfidan boshlanishi haqida ma’lumot berilgan. Independent jurnalisti Lizzi Dirden uning Tobias Ratyen (Tobias Rathjen) ekanini yozgan. Gumonlanuvchining hozir o‘chirib tashlangan Youtube’dagi sahifasida shunday ism-sharif yozib qo‘yilgan. Germaniya TIV rahbari Xayko Maas agar taxminlar o‘z tasdig‘ini topsa, bu bir yil ichida o‘ng radikallar tomonidan amalga oshirilgan uchinchi katta qotillik bo‘lishini aytgan.
Radikallashuv va siyosiy zo‘ravonlik xalqaro markazi (ICSR) asoschisi Peter Noyman jinoyatchining 24 sahifadan iborat manifest qoldirganini ma’lum qildi. Ratyen o‘z murojaatida xorijliklarga toqat qila olmasligini, asosiy aholisi musulmonlar bo‘lgan mamlakatlarni dushman hisoblashi haqida yozgan. Shuningdek, razvedka idoralarining butun umri davomida o‘zini ta’qib qilishganini bayon qilgan.
Shuningdek, u barcha amerikaliklarga shaxsiy videomurojaatini qoldirgan. Video Youtube’ga ommaviy qotilliklardan bir necha kun oldin yuklangan va 20-fevral tongida o‘chirib tashlangan, deyiladi Focus xabarida. Tobias Ratyen AQShda bolalarni o‘ldiruvchi harbiy obyektlar borligi haqida ma’lumot bergan. U amerikaliklarni bunga qarshi kurashishga chorlagan. Videorolik muallifi arab mamlakatlaridan va Turkiyadan kelgan muhojirlarni yomon ko‘rishi haqida ham gapirgan. Lekin Germaniyada ularga hujum uyushtirishi mumkinligiga sha’ma ham qilmagan.
Izoh (0)