Germaniya sudi Tesla kompaniyasini Yevropadagi birinchi ulkan zavod — “Gigafabrika” quriladigan joyda daraxtlarni kesishni to‘xtatishga majbur qildi. Zavod qurilishi Berlindan 30 kilometr uzoqlikda rejalashtirilgan. Bu haqda Meduza xabar berdi.
Ma’lum qilinishicha, sudga “Brandenburg yashil ligasi” murojaat qilgan. Liganing fikricha, zavod mahalliy yovvoyi tabiat va suv havzalariga xavf solmoqda.
Sudning qayd etishicha, 92 gektarli hududni tozalash uchun uch kun ketadi, ekologlarning murojaatini ko‘rib chiqish uchun ishlarni to‘xtatish kerak. Sud ishi bo‘yicha eshituvlar mazkur haftada bo‘lib o‘tadi.
Tesla’ning zavodi uchun u quriladigan Gryunxayd kommunasida 300 gektar yer ajratilgan. Qayd etilishicha, Tesla zavod qurilishi uchun hali rasmiy ruxsatni olmagan. Germaniya Ekologiya vazirligi esa kompaniyaga dastlabki tayyorgarlik ishlarini olib borish uchun ruxsat bergan.
Yevropadagi dastlabki Tesla zavodining qurilishi haqida 2019-yilning noyabr oyida ma’lum qilingan. Kompaniya zavod quriladigan joydagi ko‘rshapalaklar, sudralib yuruvchilar va chumolilar koloniyasini ko‘chirishga va’da bergan.
Ilon Maskning fikricha, Germaniyadagi zavod juda ko‘p suv sarf qilmaydi. Uning qayd etishicha, o‘rmon tabiiy emas, u karton ishlab chiqarish zavodi uchun ekilgan.
Avvalroq Tesla aksiyalari koronavirus sababli bir kunda 20 foizga tushib ketgan edi. Bundan avval u rekord darajada qimmatlashgandi.
Izoh (0)