Jinoyat ishlari bo‘yicha Quyi Chirchiq tuman sudi binosida 12-fevral kuni sudlanuvchilar, chinozlik Ahmadboy (Ahmadjon Tursunboyev) va uning sheriklariga nisbatan jinoyat ishining tergov bilan yakunlangan qismini ko‘rib chiqish bo‘yicha to‘rtinchi ochiq sud jarayoni nihoyasiga yetdi va sud hukmi e’lon qilindi.
“Daryo” muxbiri Mirolim Isajonovning xabar berishicha, Ahmadboy sud jarayonidagi qisqa tanaffus paytida jurnalist va blogerlarning turli savollariga javob qaytardi. U o‘z intervyusida keng ommani qiziqtirgan mavzulardan biri — unga qaysi san’atkorlar pul berib, foydalangani haqidagi savolga javob berdi.
‘Falonchi artist sizga pul bergan ekan’, degan gaplarni o‘zim ham eshitdim. Birinchidan, men san’atkorlar bilan oldi-berdi qilmaganman. O‘sha paytda o‘g‘il to‘y o‘tkazganimda, to‘yona hisobidan kelgan u artistlar. Lekin men san’atkorlardan pul olmaganman. ‘Sherali Jo‘rayevdan pul olibdi, Ozoddan pul olibdi’, degan gaplarning barchasi dedi-dedi xolos.
Endi kimdir birov orqali pul kirgizdirmagan bo‘lsa, ammo biror artistning o‘zi kelib, menga ‘Mana 50 ming dollar, mana 100 ming dollar’ deb pul bermagan. Men san’atkorlar bilan umuman oldi-berdi qilmaganman. O‘zingiz o‘ylang, menda 12 ming nafar jabrlanuvchi bor. Ularning daftardagi ism-familiyasini bilamiz. Menga farqi yo‘q, artist kelib pul beradimi, boshqasi keladimi. Men uchun hammasi oddiy bir fuqaro.
Ahmadjon Tursunboyev
