Bo‘stonliqning tog‘li hududlaridagi yo‘llar chetiga nur qaytaruvchi ustunchalar o‘rnatildi

Toshkent viloyatining Bo‘stonliq tumani tog‘li hududlaridagi yo‘llar chetiga nur qaytaruvchi ustunchalar o‘rnatildi. Bu haqda Toshkent viloyati IIBB YHXB axborot xizmati “Daryo”ga ma’lum qildi.

Xabar berilishicha, harakatlanish xavfsizligini ta’minlash samaradorligini oshirish maqsadida Bo‘stonliq tumanining tog‘li hududlarida haydovchilarga tungi vaqtda, shuningdek, yog‘ingarchiliklar vaqtida ham avtomobil yo‘li qatnov qismining chegarasini ko‘rsatib turuvchi nur qaytaruvchi, elastik egiluvchan ogohlantiruvchi ustunchalar o‘rnatish boshlandi.

Turkiyada ishlab chiqarilgan bu ustunchalar avvalgi beton ustunchalarning o‘rnini egallamoqda. Yangi ustunchalar transport vositasi biror-bir sabab bilan yo‘ldan chiqib ketib, unga kelib urilganida egilib qoladi va transport vositasiga jiddiy shikast yetkazmaydi. Transport vositasi olingach esa u yana asl holatiga qaytadi.

Mazkur yangilikni viloyatning barcha shahar va tumanlarida joriy etish rejalashtirilmoqda. Sababi, ustunchalardagi nur qaytaruvchi moslama yoritilmagan yo‘llarda ham harakatlanish xavfsizligini ta’minlashga ijobiy hissa qo‘shadi, deyiladi boshqarma xabarida.