IIV huzuridagi Tergov departamenti “Avto rental” korxonasi mansabdor shaxslariga nisbatan qo‘zg‘atilgan jinoyat ishi tafsilotlarini oshkor qildi. Bu haqda Ichki ishlar vazirligi huzuridagi Tergov departamenti xabar qilgan.
“Avto rental” nomi ostida faoliyat yuritgan korxona qulay shartlarda, hech qanday foizlarsiz, 40 oy davomida bo‘lib to‘lash sharti bilan yengil avtomobillar yetkazib berishni taklif qilib, 700 ga yaqin fuqarolarning ishonchiga kirgan va umumiy hisobda qariyb 3 milliard so‘m mablag‘ni o‘zlashtirib olgan.
Korxona o‘zini targ‘ibot ishlarida avtomobillarni foizsiz va oyma-oy bo‘lib to‘lash yo‘li bilan taqdim etayotgan O‘zbekistondagi yagona kompaniya deb e’tirof etgan. Narxi 100 million so‘mgacha bo‘lgan transport vositalari uchun 4 million so‘m, 100 milliondan ortiq bo‘lgan transport vositalari uchun 5 million so‘m va 200 million so‘mdan ortiq bo‘lgan transport vositalari uchun 12 million so‘mdan pul olib, avtomobillarni 3 oydan 7 oygacha bo‘lgan vaqt mobaynida yetkazib berishi aytilgan. Firma o‘zining qisqa vaqt davomidagi faoliyatida yuzlab odamlarni aldashga va o‘zgalarning milliardlab mablag‘larini o‘zlashtirishga ulgurgan.
Firmaning jinoiy faoliyati huquqni muhofaza qiluvchi organlar tomonidan fosh etilib, hozirda tergov harakatlari olib borilmoqda. Ichki ishlar vazirligi huzuridagi Tergov departamenti xodimlarining so‘zlariga ko‘ra, “Avto rental” MChJ mansabdor shaxslariga nisbatan qo‘zg‘atilgan jinoyat ishi bo‘yicha jami 3 kishiga ayblov e’lon qilingan. Jamiyat fuqarolar bilan 695 ta shartnoma imzolagan, ammo shartnoma shunday rasmiylashtirilganki, unda aynan qaysi turdagi transport vositasi yetkazib berish ham ko‘rsatilmagan. Jamiyat fuqarolardan olgan pul mablag‘larining umumiy qiymati 2,8 milliard so‘m bo‘lib, shundan faqat 1,9 milliard so‘mini bank hisob raqamiga kirim qilgan, qolgan pul naqd shaklda qabul qilinib, korxona mutasaddilarining shaxsiy manfaatlari yo‘lida sarflangan.
“O‘z navbatida, bank hisob raqamiga kirim qilingan 1,9 milliard so‘m pul mablag‘lari ham shartnoma shartiga ko‘ra fuqarolarga transport vositasi olib berishga sarflanmasdan, o‘zlarining ta’sischiligida bo‘lgan, ammo boshqa xo‘jalik yurituvchi subyektlarning hisob raqamlariga turli xil maqsadlarda chiqarib yuborilgan. Korxona 695 nafar fuqaro bilan shartnoma tuzgan bo‘lsa-da, hech qaysi birining oldidagi majburiyatni bajarmagan. Barcha pul mablag‘lari jamiyat rahbarlari va mansabdor shaxslari tomonidan o‘zlashtirib olingan. Shu sababli, jamiyat rahbari va ta’sischisiga nisbatan qamoqqa olish ehtiyot chorasi qo‘llanilgan va yana bir ta’sischiga nisbatan qidiruv e’lon qilinib, qamoq ehtiyot chorasi tayinlangan”, — deydi Tergov departamenti katta tergovchisi Farhod Ergashev.
Dastlabki tergov tafsilotlarida aytilishicha, “Avto rental” MChJning bosh ofisi Toshkent shahrida joylashgan, jamiyatning yagona filiali Andijon viloyatida bo‘lgan, lekin korxona jabrlanuvchilari respublikaning deyarli barcha hududlarida bor.
“Jamiyatni tuzishda ishtirok etgan, ya’ni jinoyatga bosh bo‘lgan shaxs barchaga rollarni bo‘lib bergan, ya’ni biri hisobchi, biri ish boshqaruvchi, yana boshqasi moliyaviy tomonga javobgar bo‘lgan. Shunga qaramay, korxonada jinoiy harakatlardan bexabar ishchilar ham ishlagan. Shu sababdan faqatgina korxona mansabdor shaxslari javobgarlikka tortilgan.
Jinoyat yuzasidan fuqarolarga yetkazilgan zararni undirish maqsadida jamiyatning hisob raqamida bo‘lgan qoldiq summa, ya’ni 390 million so‘m Tergov departamentining depozit hisob raqamiga o‘tkazilgan. Shuningdek, korxona rahbariga tegishli bo‘lgan Mercedes-Benz rusumli transport vositasi 400 million so‘mga baholangan va olib qo‘yilgan”, — deydi Farhod Ergashev.
Shu tariqa, hozirgi kunda korxona jabrlanuvchilariga yetkazilgan 2,8 milliard so‘m zararning 790 million so‘mi undirilgan. Tergovchiga ko‘ra, undirib olingan mablag‘lar faqat sudning qonuniy kuchga kirgan hukmi bilangina jabrlanuvchilarga qaytarib berilishi mumkin.
Mazkur jinoyat ishi bo‘yicha dastlabki tergov harakatlari davom etmoqda.
Izoh (0)