Toshkentda qurilayotgan halqa metro liniyasining birinchi bosqichi bo‘lgan Do‘stlik–Qo‘yliq uchastkasida 6 ta bekat qurib bitkazildi. Bu haqda “O‘zbekiston temir yo‘llari” AJ matbuot xizmati xabar berdi.
2019-yilning avgust oyida Toshkent halqa metro liniyasining birinchi bosqichi bo‘lgan Do‘stlik–Qo‘yliq uchastkasidagi Do‘stlik-2 hamda 2-bekatlarida qurilish ishlari tugatildi. Oraliq yo‘nalishida 2 ming 303 metrlik yangi relslar ham yotqizilib, dastlabki poyezdlar sinov tariqasida harakatlangan edi.
“Ma’lumki, ‘Toshkent metropoliteni’ UKning Do‘stlik bekatidan Qo‘yliq bozorigacha bo‘lgan yo‘nalishi 11 kilometr bo‘lib, Do‘stlik-2 hamda 2, 3, 4, 5, 6 hamda Qo‘yliq bozoridagi 7-bekatlardan iborat. Ayni paytda Do‘stlik-2 dan Qo‘yliq mavzesigacha estakadalarning loyihada ko‘zda tutilgan tayanch ustunlar, birinchi va ikkinchi pog‘ona temir-beton poydevorlar, temir-beton rigel va balkalar to‘liq o‘rnatib bo‘lindi.
2-bekatdan Yangiobod hududidagi oltinchi bekatgacha bo‘lgan oralig‘iga yangi relslar ham yotqizilib, so‘nggi bosqichda ta’mirlash ishlari olib borilmoqda. Ayni paytda quruvchilarimiz oltinchi hamda Qo‘yliq bozoridagi yettinchi bekat oralig‘ida bunyodkorlik ishlarini jadal sur’atlarda amalga oshirmoqda. Buning uchun 2 mingga yaqin ishchi-xodim va mutaxassis, yuzdan ko‘proq zamonaviy texnikalardan foydalanmoqda”, – deydi “O‘zbekiston temir yo‘llari” AJning Kapital qurilish direksiyasi rahbar o‘rinbosari Aziz Abdiyev.
Bugungi kunga kelib 2, 3, 4, 5 hamda 6-bekatlarda ham qurilish ishlari nihoyasiga yetkazildi. Yangi qurib bitkazilgan bekatlarda yo‘lovchilarga qulaylik yaratuvchi zamonaviy texnologiyalar, yo‘lkirani elektron to‘lash imkonini beruvchi turniketlar hamda eskalator bilan jihozlangan. Ikki qavatli bekatlarning har biriga imkoniyati cheklangan yo‘lovchilar uchun maxsus liftlar ham o‘rnatildi.
Ushbu yo‘nalishda poyezdlarning o‘rtacha yurish tezligi soatiga 60 kilometrni tashkil etadi. Harakatlanish oraliq vaqti 5 daqiqadan iborat bo‘lib, bekatlar 5 ta vagon to‘xtashi uchun mo‘ljallangan. Rossiya Federatsiyasidan metro liniyalarining estakada yo‘nalishida harakatlanadigan zamonaviy, yuqori sifatli, yo‘lovchilar uchun barcha qulayliklarga ega dastlabki beshta harakat tarkibi keltirildi va bugungi kunda bularning barchasi xizmat ko‘rsatish uchun texnik jihatidan har tomonlama tayyorgarlik ko‘rmoqda.
Izoh (0)