Тошкент метроси «Юнусобод» йўлининг давомини қуриш вақтида юз берган фожиа оқибатида ҳалок бўлганларга тўланиши керак бўлган товон пулларини ҳисоблаш жараёнлари давом этмоқда. Бу ҳақда Бандлик ва меҳнат муносабатлари вазирлиги Давлат меҳнат инспекцияси бошлиғи Қудратулло Одинаев «Kun.uz»га маълум қилди.
18 декабрь куни метро қурилиши майдонида тупроқ кўчиши оқибатида олти ишчи ҳалок бўлганди. Шу куннинг ўзида ҳодиса сабабларини ўрганиш ва оқибатларини бартараф этиш учун ҳукумат комиссияси тузилган эди. Комиссия таркибига Бандлик ва меҳнат муносабатлари вазирлиги вакиллари ҳам киритилган.
«Вазирликнинг Давлат меҳнат инспекцияси иштирокида бахтсиз ҳодиса сабаблари ўрганиб чиқилмоқда. Фожиа оқибатида ҳалок бўлганларга тўланиши керак бўлган товон пулларини ҳисоблаш жараёнлари давом этмоқда... Шунингдек, ҳодиса қурбонларининг оилаларига товон пулларини тўлаш бўйича тегишли тартибда прокуратура билан ҳамкорлик олиб борилмоқда», — деб айтган Қудратулло Одинаев.
Қайд этиш жоиз, «Ўзбекистон темир йўллари» компанияси 19 декабрь куни ҳукумат комиссияси кўрсатмасига мувофиқ ҳалок бўлган ҳар бир ишчининг оиласига 100 миллион сўмдан маблағ ажратилиб, шу куннинг ўзида топширилгани ҳақида хабар берган эди.
Ўшанда компания раҳбари Ҳусниддин Ҳосилов: «Ўз номимдан шуни ваъда қиламанки, биз фожиали вафот этганларнинг оилалари учун муносиб ҳаётни таъминлаш учун барча шароитларни яратишга тайёрмиз», — деганди.Қудратулло Одинаевнинг қўшимч қилишича, фожиа юзасидан тузилган ҳукумат комиссиясининг дастлабки хулосалари «икки-уч кун» ичида эълон қилинади. Агар унда ишчиларнинг ўлими меҳнат вазифаларини бажариши билан боғлиқ ҳолда юз бергани тасдиқланса, қонунчиликда белгиланган тартибда ва миқдорларда бошқа тўловлар ҳам амалга оширилиши лозим бўлади.
Жумладан, Меҳнат кодексининг 192- ва 193-моддалари ходимнинг вафоти муносабати билан унинг қарамоғида бўлган шахсларга зарар тўловлари тўланиши лозимлигини кўзда тутади.
Изоҳ (0)