O‘zbekiston Prezidenti “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunni imzoladi. Bu haqda O‘zbekiston Senati tomonidan ma’lum qilindi.
Mazkur qonun hujjatiga asosan “Oilaviy tadbirkorlik to‘g‘risida”gi qonunga quyidagilarni nazarda tutuvchi qator normalar kiritilgan:
- yuridik shaxs tashkil etmagan holda oilaviy tadbirkorlik subyektlari 3 nafargacha doimiy xodimni yollab, ular bilan mehnat shartnomasi tuzishga haqli;
- oilaviy korxona ishtirokchilarining umumiy yig‘ilishda oilaviy tadbirkorlik ishtirokchilari tarkibini o‘zgartirish to‘g‘risidagi masala ko‘rib chiqilishi va hal etilishi mumkin.
Kiritilgan o‘zgartirishlarga ko‘ra, aktivlarining balans qiymati bazaviy hisoblash miqdorining 100 ming baravari miqdoridan ko‘p bo‘lgan mas’uliyati cheklangan hamda qo‘shimcha mas’uliyatli jamiyatlar auditor tekshiruvidan o‘tkazishi shart ekanligi belgilangan. Bu esa aktivlar kapitallashuvi muntazam o‘sishi, bajariladigan operatsiyalar hajmi ko‘payishi bilan izohlanadi.
Bundan tashqari, “Mas’uliyati cheklangan hamda qo‘shimcha mas’uliyatli jamiyatlar to‘g‘risida”gi qonun yana bir modda bilan to‘ldirilgan. Unda nazarda tutilishicha, jamiyat ishtirokchilari o‘rtasida murosasiz ziddiyatlar sababli qaror qabul qilish uchun yetarli ovozlar soni mavjud bo‘lmaganligi tufayli jamiyatni boshqarish masalalari yuzasidan kelishuvga erishish mumkin bo‘lmagan taqdirda nizoli vaziyat sud tartibida hal etiladi.
Minoritar aksiyadorlar huquq va qonuniy manfaatlari himoyasini kuchaytirish maqsadida “Aksiyadorlik jamiyatlari va aksiyadorlarning huquqlarini himoya qilish to‘g‘risida”gi qonunga ham norma kiritilgan. Unga ko‘ra, yirik bitim tuzish shartlari baholovchi tashkilot tomonidan belgilangan bozor qiymati hisobga olingan holda mustaqil tashqi auditorlik tashkiloti tomonidan o‘rganiladi.
Izoh (0)