Шавкат Мирзиёев: Парламентда соғлом рақобат бўлиши керак. Мухолифат қўрқмасин

Олий Мажлис Қонунчилик палатасининг сайловдан кейинги биринчи мажлисида сўзга чиққан Президент Шавкат Мирзиёев парламент ҳақида фикр билдирди. Бу ҳақда «Дарё» мухбири Миролим Исажонов хабар берди.

Ўйланглар, биз оғир, таҳликали замонда яшаяпмиз. Ҳар кунимиздан тўғри хулоса чиқариш керак бўлган замонда яшаяпмиз. Ён-атрофимизда бўлаётган воқеалар — кичкина масалалар эмас. Қанчалар оғир бўлмасин, Ўзбекистоннинг эртага яхши бўлишини хоҳлаётганлардан кўра хоҳламаётганлар кўплиги, ташқаридан ҳеч ким келиб, бизга ҳеч бало қилиб бермаслигини кўз олдингизга келтиринг. Сизлар энди кичкина одам эмассизлар.

Депутатнинг қалби, виждони уйғоқ бўлса, вазирлар ҳам, ҳукумат ҳам, парламент ҳам уйғоқ бўлади. Мана шуни ёзиб олинглар.

Уйғоқ дегани — интилувчан, тиришқоқ, бефарқ бўлмаган одам. Агар депутат шундай бўлса, яна такрорлайман, вазирлар ҳам, ҳукумат ҳам, парламент ҳам уйғоқ бўлади. Бутун жамиятимиз уйғоқ бўлади. Бугун биз ҳамма соҳада изланиш ва ўрганишдамиз. Такрор ва такрор айтаман — депутат бўлишга ҳали ҳаммамиз ҳам тайёр эмасмиз. Тайёр бўлишимиз учун, изланишимиз, уйғонишимиз, яна бир бора ўқишимиз керак.

Изланиб яшаётган, ўз мақсади сари изчил бораётган инсон ва жамият, албатта, ижобий натижа ва ютуқларга эриша олади. Ҳозирги кунда Ўзбекистон тараққиётининг янги босқичида олдимизда ўта долзарб ва мураккаб вазифалар турибди. Жуда мураккаб вазифалар турибди. Ҳали «ура-ура» деб қарсак чалиш учун кўп йиллар давомида машаққатли, матонатли, сабр-тоқатли меҳнатимиз талаб этилади. Уларни муваффақиятли ҳал этиш учун, аввало, қонун ижодкорлиги соҳасида ишни бутунлай янгича ташкил этишимиз зарур. Бу борада айниқса қуйидаги масалаларга алоҳида эътибор қаратиш лозим.

Биринчидан, қуйи палата ҳар бир қонун лойиҳаси бўйича холис баҳс-мунозара ва тортишувлар маконига, турли ижтимоий манфаатлар ўртасидаги кураш майдонига, чинакам демократия мактабига айланиши зарур. Ўтган беш йил давомида палата фаолияти сезиларли даражада жонланиб, 540 та ёки 2010—2014 йиллардагига нисбатан икки баробар кўп қонун лойиҳаси кўриб чиқилди. 2015 йилда қабул қилинган қонунларнинг бор-йўғи 11 тасини яхлит ва янги қонунлар ташкил этган бўлса, 2019 йилда бу кўрсаткич уч баробар ошиб, 35 тага етди.

Шуни алоҳида таъкидлаш керакки, бир соҳага таалуқли ижтимоий муносабатларни тартибга соладиган бир нечта қонунлар ўрнига ягона кодекс қабул қилиш амалиёти қарор топмоқда. Бу жуда яхши. Жумладан, Фуқаролик процессуал кодекси, Иқтисодий процессуал кодекси, Маъмурий суд ишларини юритиш тўғрисидаги кодекс, Сайлов кодекси каби муҳим ҳужжатлар қабул қилинди. Шунингдек, ўтган икки йилда тўғридан-тўғри амал қиладиган қонунлар қабул қилиниши бошланди. Масалан, «Тўловлар ва тўлов тизимлари тўғрисида»ги, «Инвестиция ва инвестиция фаолияти тўғрисида»ги қонунларда ҳаволаки нормалар ўрнига тўғридан-тўғри ишлайдиган қоидалар белгиланди.

Айни вақтда ҳаётнинг ўзи Ўзбекистоннинг жадал тараққиёти бу борадаги фаолиятимизни янги сифат босқичига олиб чиқишни талаб этмоқда. Ҳаётнинг ўзи талаб қилмоқда. Янги босқичга, янги сифатга кўтарилишимиз керак. Жаҳондаги илғор тажрибалари асосида партиялар ўз сиёсий манфаатлари, ўз электрорати манфаатларини ифода этадиган қонунлар қабул қилиш учун парламентда қизғин баҳс олиб боришлари керак. Бунинг учун парламентда кўпчиликни ташкил этадиган партия ва унга мухолифатда бўлган партиялар ўртасида соғлом рақобат бўлиши ҳам шарт. Акс ҳолда рақобат бўлмайди. Қўрқманглар, мухолифат. Ўрганинглар шунга.

Кимдир ўз таклифини айтса, ундан қўрқиб, «ундай бўлибди, ўзгарибди, оёғи ердан узилибди», деб. Хато қилган бўлса ҳам, у ўз фикрини айтади. Тўғриланглар, чиқиб, қонуний асослаб беринглар, «сиз нотўғри айтяпсиз, мана бу банди бундай, унисига тўғри келмайди, мен сайловчиларим билан ўзим гаплашдим», деб айтинглар. Лекин бу гапларни айтиш учун кечқурун уйга бориб телевизор эмас, китоб ўқиш керак. Бешта савол бериш учун бешта китоб ўқишингиз керак. Мана ҳаётингизда қандай масъулиятли жараён бошланяпти. Бу кичкина масалалар эмас. Соғлом рақобат ташкил қилмасаларинг, кечаги сайловга берган баҳони бутун 825 нафар кузатувчи олти ойда, бир йилда сизларнинг ишингизга қараб, Ўзбекистонга баҳо беради.

Шавкат Мирзиёев, Ўзбекистон Президенти