Madaniyat vazirligi Samarqanddagi “Ashratxona” maqbarasini mehmonxonaga aylantirish bo‘yicha xorijiy davlat tomonidan hech qanday murojaat tushmaganini ma’lum qildi.
Ta’kidlanishicha, Madaniyat vazirligiga “Ashratxona” (Ishratxona) maqbarasini ta’mirlash-tiklash ishlarini olib borishga yoki mehmonxonalarga moslashtirish bo‘yicha xorijiy davlat tomonidan murojaatlar tushmagan.
Ommaviy axborot vositalarida tarqalayotgan ma’lumotlarga ko‘ra, ispaniyaliklar tomonidan ushbu madaniy meros yodgorligi mehmonxonaga aylantirish masalasi ko‘rilayotganligi yozilmoqda.
Moddiy madaniy meros obyektida ta’mirlash tiklash ishlar yoki mehmonxonalarga moslashtirish ishlarini olib borish uchun, Vazirlar Mahkamasining 2019-yil 30-martdagi 265-sonli qaroriga muvofiq, obyekt bo‘yicha birlamchi loyiha takliflarini, Madaniy meros departamentining Ilmiy-ekspert kengashiga taqdim etiladi. (Ma’lumot uchun, Ilmiy-ekspert kengashi tarkibi, a’zolari ilmiy darajaga ega bo‘lgan olimlardan iborat)
O‘z navbatida Ilmiy-ekspert kengash a’zolari obyektning loyiha takliflarini ko‘rib chiqib, obyekt bo‘yicha o‘z xulosalarini beradi.
Avvalroq, O‘zbekiston Turizmni rivojlantirish davlat qo‘mitasi raisi vazifasini vaqtincha bajaruvchi Abdulaziz Aqqulovning Ispaniya mehmonxonalar tarmog‘i vakillari bilan uchrashuvda Paradores de turismo de Espana kompaniyasi Samarqand va Buxoroda mehmonxonalar qurish imkoniyatini ko‘rib chiqayotgani haqida xabar berilgandi.
Izoh (0)