“Deputatlarning jig‘iga tegishga ruxsat berilgandi”. Rejissor Sarvar Karimov — xayoliy “Qo‘ldan kelgancha” partiyasiga bag‘ishlangan rolik haqida

Xayoliy “Qo‘ldan kelgancha” partiyasi haqidagi rolikni internetga chiqarish oldidan va chiqargandan so‘ng uning mualliflariga nisbatan hech qanday bosim o‘tkazilmagan, “hech qanday muammo yuzaga kelmagan”. Bu haqda rolik muallifi, rejissor Sarvar Karimov Lazizbek Hamidovning “Ular” dasturiga bergan intervyusida aytib o‘tdi.

Sarvar Karimovning ta’kidlashicha, 2019-yilgi parlament saylovlari arafasida saylov komissiyasi vakillari bilan uchrashuv bo‘lgan va unda “zamon o‘zgargani” aytilib, “deputatlarning jig‘iga tegadigan roliklar” olish mumkinligi ma’lum qilingan.

“Nega bunaqa roliklar olding?”, “Nima bo‘lyapti o‘zi?”, “Bu bilan nima demoqchisan?”, deb ko‘pchilik so‘radi. Saylovoldi kampaniyasi boshlanishi oldidan Sherzodxon Qudratxo‘jayev hammani yig‘ib (u yerda jurnalistlar, bir-ikki rejissor, umuman ko‘pchilik bor edi), bu galgi saylov o‘tgan yillardagiga nisbatan boshqacha bo‘lishi, juda katta pul ajratilgani, saylovlar haqida roliklar olish, saylovni yaxshilab yoritish kerakligini aytdi.

Shunda jurnalistlardan biri yaxshi savol berdi: “Biz-ku yoritishga yoritamiz, lekin deputatlarning o‘zidan hech qanaqa gap chiqmasa, ishlamasa, nimani yoritamiz?”. Unda hali (debatlardagi) qovun tushirishlar boshlanmagan edi. Shunda Sherzod aka: “Yo‘q, kerak bo‘lsa deputatlarning ozgina jig‘iga tegadigan roliklar ham qilinglar, ular ishlasin, harakat qilsin, axir biz ularni saylab qo‘yyapmiz-ku! Bo‘ldi, zamon o‘zgardi”, — dedi.

Keyin so‘radim: “Demak, ozgina jig‘iga tegadigan rolik qilsa ham bo‘ladi?”. “Albatta, faqat qonundan chetga chiqmagan holda”, degan gap bo‘ldi. Uchta rolik tayyorladim. Ulardan birini davlat buyurtmasi sifatida ko‘rish mumkin — “O‘zbekkino”ning buyurtmasi edi. U rolikda ham Sobir Otajonov va Vazira Yunusova o‘ynagan; oddiy, hech qanaqa satirasi yo‘q, lekin yumori bor rolik — er-xotin saylovga chiqishi haqida. Uni topshirdik, efirga ham ketdi, adashmasam.

Keyin o‘z xohishim bilan, “hazil qilsa bo‘larkan-ku, ruxsat berishdi-ku” deb (umuman olganda, ruxsat berishmasa ham olaversam bo‘lardi — juda ruxsat so‘rab yuradigan odatlarim yo‘q), “Qo‘ldan kelgancha” partiyasi haqida hazil rolik oldik. Bu rolikning internetda chiqarilishiga hech kim qarshilik ko‘rsatmadi. Hech qanday muammo bo‘lgani yo‘q.

Sarvar Karimov, kinorejissor

Saylovga bordim, rafiqam bilan birga bordik. To‘g‘risini aytsam, uyda kam bo‘laman — uyimizga birov kelib, “menga ovoz bering”, deb qog‘oz tarqatdimi-yo‘qmi, bexabarman. “Kimdir keldimi, oldin qandaydir qog‘ozlar berishardi”, deb so‘radim, uydagilar ham: “Yo‘q”, deyishdi. Lekin baribir saylovga chiqish kerak.

Chiqdim va do‘stim Sardor Babayev: “Ayollarga ovoz bersanglar, foyda topasizlar”, degani uchun, bir ayol kishi bor ekan, unga ovoz berdim. Keyin Ekopartiyaga ham bir ovoz berdim — “daraxtlar nega kesilyapti?” degan savolga kimdandir javob olish uchun. Keyin “Adolat” partiyasidan ham kimgadir ovoz berdim. Uchta edi-ku, lekin unchalik farqiga borganim yo‘q, lekin ovoz berdim.

Sarvar Karimov, kinorejissor