“O‘zkimyosanoat” aksiyadorlik jamiyati tomonidan Axborot va ommaviy kommunikatsiyalar agentligida matbuot anjumani tashkil etildi. Bu haqda jamiyat matbuot xizmati “Daryo” ga xabar berdi.
Tadbirda “O‘zkimyosanoat” aksiyadorlik jamiyati tomonidan O‘zbekiston Respublikasi Prezidentining 2019-yil 3-apreldagi “Kimyo sanoatini yanada isloh qilish va uning investitsiyaviy jozibadorligini oshirish to‘g‘risida”gi PQ-4265-sonli Qarori ijrosi yuzasidan amalga oshirilgan ishlar yuzasidan ma’lumot berildi.
Shuningdek, Qaror bilan tasdiqlangan Kimyo sanoatini rivojlantirishning 2019/2030-yillarga mo‘ljallangan dasturi va ushbu dastur doirasida qiymati 12,1 milliard dollarga teng, shu jumladan 1,7 milliard dollar miqdorida to‘g‘ridan-to‘g‘ri xorijiy investitsiyalar va kreditlar hisobiga amalga oshirilishi rejalashtirilgan 31 ta investitsiya loyihalariga ham to‘xtalib o‘tildi.
Demak, kimyo sohasini rivojlantirish va isloh qilish borasida oxirgi uch yilda kimyo sohasida o‘zlashtirilgan investitsiyalar miqdori 1 milliard 373 million dollari miqdorida bo‘lib, bunday investitsiya miqdori avvalgi o‘n yillarda ham kiritilmaganligi alohida ta’kidlash lozim.
Dekabr oyining so‘nggi kunlari “Navoiyazot” aksiyadorlik jamiyatida polivinilxlorid, kaustik soda va metanol ishlab chiqarish majmuasi ishga tushirildi. Yangi korxonada yiliga 100 ming tonna polivinilxlorid, 75 ming tonna kaustik soda, 300 ming tonna metanol ishlab chiqariladi. Bu mahsulotlarga avtomobilsozlik, to‘qimachilik, metallurgiya, kimyo, neft-gaz tarmoqlari, elektr texnikasi va qurilish materiallari ishlab chiqarishda talab yuqori. Ular shu paytgacha katta valyuta evaziga import qilinardi. Ayniqsa, kichik biznes subyektlari bu masalada juda qiynalardi, deyiladi xabarda.
Bu yangi majmua respublika korxonalarini zarur xom-ashyo bilan ta’minlaydi. Shuningdek, har yili 40 million dollarlik mahsulot eksport qilish rejalashtirilgan. Yangi majmuada 900 dan ziyod ish o‘rni yaratildi.
Avval “O‘zkimyosanoat” faqat mineral o‘g‘it ishlab chiqarish bilan shug‘ullanar edi, hozirgi kunda ishlab chiqarilayotgan boshqa turdagi (organik, noorganik, kimyo reagentlari va boshqa) kimyo mahsulotlarining turi 108 taga yetdi hamda umumiy ishlab chiqarilayotgan mahsulotlarning 23 foizini tashkil qilmoqda. Kimyo sanoatini rivojlantirish bo‘yicha qabul qilingan Strategiyani amalga oshirilishi natijasida, 2020-yilda boshqa turdagi kimyo mahsulotlarining ulushi 35 foizni tashkil qilishi va 2030-yilda esa 55 foizga yetadi.
2019-yil yakuni bilan 6,3 trilion so‘mlik mahsulotlar ishlab chiqarilishi ta’minlandi. Bu o‘tgan yilga nisbatan 1,5 barobar ortiqligini ko‘rsatadi.
O‘tgan yilda sof holda jami 1 million 220 ming tonna, jumladan, 900 ming tonna — azotli, 120 ming tonna — fosforli, 200 ming tonna — kaliyli mineral o‘g‘itlar ishlab chiqarildi.
28 turdagi mahsulot turlarini mahalliylashtirish hisobiga 806 milliard so‘mlik mahsulotlar ishlab chiqarildi. Shuningdek, tarmoqlararo kooperatsiya va mahsulotlarni mahalliylashtirish hisobiga import hajmi 29 million dollarga qisqartirildi.
Mahsulot ishlab chiqarish xarajatlari (tannarxi) jami 702 milliard so‘mga qisqartirildi.
30 turdagi kimyoviy mahsulotlarni 25 dan ziyod mamlakatlarga qariyb 190 million dollarlik eksport tushumi ta’minlandi.
Izoh (0)