Futbol bo‘yicha O‘zbekiston olimpiya terma jamoasi Tailand mezbonlik qilayotgan 23 yoshgacha futbolchilar o‘rtasidagi Osiyo chempionatining chorak finalida 19-yanvar kuni BAA termasiga qarshi bahs olib boradi.
Milliy olimpiya qo‘mitasi xabariga ko‘ra, ushbu uchrashuvga qadar “Nasaf” ustozi Ro‘ziqul Berdiyev hamda O‘zbekiston milliy terma jamoasi va “Bunyodkor” bosh murabbiyi Vadim Abramov Tailandga yetib boradi.
Ta’kidlanishicha, ularning tashrifidan asosiy maqsad terma jamoa tarkibidagi futbolchilarni qo‘llab-quvvatlash va ularni yanada ruhlantirishdan iborat. Olimpiya terma jamoasi o‘zagi “Nasaf” (10 nafar) va “Bunyodkor” (5 nafar) klublaridan o‘yinchilaridan iborat. Ikkala murabbiy 18-yanvar kuni Tailandga yetib boradi.
O‘zbekiston termasining ayni damdagi ustozi serbiyalik Lyubinko Drulovich hisoblanadi. Jamoa ushbu chempionatda uning qo‘l ostida guruh bosqichida uchta o‘yindan bittasida (Xitoy) g‘alaba qozongan bo‘lsa, bitta o‘yinda durang (Eron) qayd etdi, so‘nggi bahsda esa Janubiy Koreyaga mag‘lub bo‘ldi.
MOQ’ning alohida qayd etishicha, Berdiyev va Abramov Drulovich va uning murabbiylar shtabi ishiga aralashmaydi.
Eslatib o‘tamiz, Lyubinko Drulovich 2019-yil 23-yanvaridan beri O‘zbekiston olimpiya terma jamoasiga ustozlik qilib kelmoqda. U Milliy olimpiya qo‘mitasiga Umid Ahmadjonov boshchilik qilayotgan vaqtda terma jamoa boshqaruviga kelgandi.
Izoh (0)