Футбол бўйича Ўзбекистон олимпия терма жамоаси Таиланд мезбонлик қилаётган 23 ёшгача футболчилар ўртасидаги Осиё чемпионатининг чорак финалида 19 январь куни БАА термасига қарши баҳс олиб боради.
Миллий олимпия қўмитаси хабарига кўра, ушбу учрашувга қадар «Насаф» устози Рўзиқул Бердиев ҳамда Ўзбекистон миллий терма жамоаси ва «Бунёдкор» бош мураббийи Вадим Абрамов Таиландга етиб боради.
Таъкидланишича, уларнинг ташрифидан асосий мақсад терма жамоа таркибидаги футболчиларни қўллаб-қувватлаш ва уларни янада руҳлантиришдан иборат. Олимпия терма жамоаси ўзаги «Насаф» (10 нафар) ва «Бунёдкор» (5 нафар) клубларидан ўйинчиларидан иборат. Иккала мураббий 18 январь куни Таиландга етиб боради.
Ўзбекистон термасининг айни дамдаги устози сербиялик Любинко Друлович ҳисобланади. Жамоа ушбу чемпионатда унинг қўл остида гуруҳ босқичида учта ўйиндан биттасида (Хитой) ғалаба қозонган бўлса, битта ўйинда дуранг (Эрон) қайд этди, сўнгги баҳсда эса Жанубий Кореяга мағлуб бўлди.
МОҚ’нинг алоҳида қайд этишича, Бердиев ва Абрамов Друлович ва унинг мураббийлар штаби ишига аралашмайди.
Эслатиб ўтамиз, Любинко Друлович 2019 йил 23 январидан бери Ўзбекистон олимпия терма жамоасига устозлик қилиб келмоқда. У Миллий олимпия қўмитасига Умид Аҳмаджонов бошчилик қилаётган вақтда терма жамоа бошқарувига келганди.
Мавзуга доир: ОЧ—2020. Чорак финалнинг барча жуфтликлари маълум бўлди
Изоҳ (0)