Madridning “Real” klubi Ispaniya Superkubogi finalida “Atletiko”ni mag‘lubiyatga uchratdi (0:0, penalti — 4:1) va sovrinni qo‘lga kiritdi.

Foto: Twitter

Bu Zinedin Zidanning madridliklar boshqaruvidagi 10-sovrini bo‘ldi. Avvalroq 47 yoshli mutaxassis “Real” bilan uch bor Chempionlar Ligasi, Ispaniya chempionati va Superkubogi, ikki martadan Yevropa Superkubogi hamda klublar o‘rtasidagi Jahon Chempionatida g‘olib chiqqandi.

Bu “Real” tarixidagi ikkinchi eng yaxshi natija hisoblanadi. Bu borada birinchi o‘rinni 14 ta sovrin bilan Migel Munyos egallab turibdi. Keyingi o‘rinlarda esa Luis Molovni (8) va Visente del Boske (7) bormoqda.

Fransiyalik mutaxassis “qaymoqranglilar” boshqaruvida 187-o‘yinda ishtirok etdi. Bu esa Zidan har bir 19-uchrashuvda bitta sovrinni qo‘lga kiritayotganini anglatadi.

Shuningdek, bu Zidan uchun “Real” boshqaruvidagi 9-final bo‘ldi. Zizu ularning barchasida g‘olib chiqdi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!