Зидан — «Реал» тарихидаги иккинчи энг совриндор мураббий. У ҳар 19 та ўйинда битта соврин ютмоқда

Мадриднинг «Реал» клуби Испания Суперкубоги финалида «Атлетико»ни мағлубиятга учратди (0:0, пенальти — 4:1) ва совринни қўлга киритди.

Бу Зинедин Зиданнинг мадридликлар бошқарувидаги 10-соврини бўлди. Аввалроқ 47 ёшли мутахассис «Реал» билан уч бор Чемпионлар Лигаси, Испания чемпионати ва Суперкубоги, икки мартадан Европа Суперкубоги ҳамда клублар ўртасидаги Жаҳон Чемпионатида ғолиб чиққанди.

Бу «Реал» тарихидаги иккинчи энг яхши натижа ҳисобланади. Бу борада биринчи ўринни 14 та соврин билан Мигел Муньос эгаллаб турибди. Кейинги ўринларда эса Луис Моловни (8) ва Висенте дел Боске (7) бормоқда.

Франциялик мутахассис «қаймоқранглилар» бошқарувида 187-ўйинда иштирок этди. Бу эса Зидан ҳар бир 19-учрашувда битта совринни қўлга киритаётганини англатади.

Шунингдек, бу Зидан учун «Реал» бошқарувидаги 9-финал бўлди. Зизу уларнинг барчасида ғолиб чиқди.