Мингбулоқ тумани ҳокими Нуршод Худойбердиев фермер хўжаликлари раҳбарларини кузги-қишки агротехник тадбирлар йиғилиши чоғида ножўя сўзлар билан ҳақорат қилгани учун Наманган вилояти маъмурий суди томонидан Маъмурий жавобгарлик тўғрисидаги кодекснинг 41-моддасида кўрсатилган маъмурий ҳуқуқбузарликни содир этган деб топилди. Бу ҳақда «Дарё» мухбири Азизбек Абдувалиев хабар бермоқда.
Вилоят суди раиси Салоҳиддин Турсунов раислигида 10 январь куни бўлиб ўтган очиқ суд мажлисида берган кўрсатмасида Нуршод Худойбердиев айбига иқрорлигини билдириб, ушбу ножўя ҳаракатлари жорий йил 3 январь куни вилоят ҳокими иштирокидаги йиғилишда муҳокама қилиниб, унга жиддий огоҳлантириш берилгани, келгуси иш фаолиятида муомала маданиятига қатъий риоя қилишини билдирди.
Суд Нуршод Худойбердиевга жазо тайинлашда унинг айбига иқрорлиги ва қилмишидан пушаймонлигини жазони енгиллаштирувчи ҳолатлар деб, қилмишини оғирлаштирувчи ҳолатлар мавжуд эмас деб ҳисоблади. Содир этилган ҳуқуқбузарлик ҳаракатининг хусусияти ва жазони енгиллаштирувчи ҳолатларини инобатга олиб, унга нисбатан қонун санкциясида назарда тутилган жарима жазоси тайинлашни лозим топди.
Аввал хабар берилганидек, суд Нуршод Худойбердиевга давлат фойдасига ундириш учун базавий ҳисоблаш миқдорининг йигирма баробари, яъни 4 миллион 460 минг сўм жарима жазоси тайинлади.
Изоҳ (0)