APLda dekabr oyining eng yaxshi futbolchisi va murabbiyi ma’lum bo‘ldi

Angliya Premyer Ligasi matbuot xizmati dekabr oyining eng yaxshi murabbiyi va futbolchisi nomini e’lon qildi.

Unga ko‘ra “Liverpul” himoyachisi Trent Aleksander-Arnold oyning eng yaxshi futbolchisi deb topildi. 21 yoshli futbolchi faoliyatida ilk bor ushbu sovringa ega chiqdi.

Trent dekabr oyida “Liverpul”ning APL doirasidagi 5 o‘yinida maydonga tushib, bitta gol urdi va uchta samarali uzatma amalga oshirdi.

Undan tashqari uchun sovringa Emiliano Buendia (“Norvich”), Dominik Kelvert-Lyuin (“Everton”), Kevin de Bryuyne (“Manchester Siti”), Ben Foster (“Uotford”), Denni Ingz (“Sauthempton”), Adama Traore (“Vulverhempton”) va Jeymi Vardi (“Lester”) kabi futbolchilar da’vogarlik qilgandi.

Oyning eng yaxshi murabbiyi sovrini esa “Liverpul” ustozi Yurgen Kloppga nasib etdi. Germaniyalik mutaxassis ketma-ket ikkinchi marta va ushbu mavsum to‘rtinchi bor ushbu sovrinni qo‘lga kiritdi. Uning jamoasi dekabr oyida beshta o‘yinning barchasida g‘olib chiqdi va umumiy 15:2 hisobini qayd etdi.

Klopp sovrin uchun kurashda Ole-Gunnar Sulsher (“Manchester Yunayted”) va Nayjel Pirsonni (“Uotford”) ortda qoldirdi.