Bugun, 6-yanvar kuni O‘zbekiston musulmonlari idorasi raisi Usmonxon Alimov Prezident Shavkat Mirziyoyev farmoniga asosan “El-yurt hurmati” ordeni bilan taqdirlandi. Bu haqda idora matbuot xizmati xabar bermoqda.
Muftiy hazratlariga ko‘p yillik samarali faoliyati, islom dinining oliyjanob g‘oyalarini keng targ‘ib qilib kelayotgani va tavalludining 70 yilligi munosabati bilan ushbu mukofot topshirildi.Qayd etish joizki, “El-yurt hurmati” ordeni bilan mamlakat mustaqilligi, uning iqtisodiy qudratini mustahkamlash, milliy ma’naviyat, madaniyatni yuksaltirishga katta hissa qo‘shgan, o‘z mehnati, ilmiy, jamoat ishi, mehnatsevarligi va vatanparvarligi bilan jamoatchiligining izzat-hurmatiga sazovor bo‘lgan O‘zbekiston Respublikasi fuqarolari mukofotlanadi.
Ma’lumot uchun, O‘zbekiston musulmonlari idorasi raisi, muftiy Usmonxon Alimov 1950-yilda Samarqand viloyatining Ishtixon tumanida, ziyoli oilada tavallud topgan. 1982—1983-yillarda Buxoro shahridagi Mir Arab madrasasi, 1983—1987-yillarda Imom Buxoriy nomidagi Toshkent islom instituti, 1989—1990-yillarda esa Marokashning “Karaviyn” dorilfununida tahsil olgan.
1980—1982-yillarda Samarqand viloyatining Payariq tumanida joylashgan Imom Buxoriy nomidagi jome masjidida imom noibi, 1987—1989-yillar, so‘ng yana 1990—2006-yillar mobaynida ushbu masjidning imom-xatibi sifatida faoliyat yuritgan. Shu bilan birga, 2000-2006-yillarda O‘zbekiston musulmonlari idorasining Samarqand viloyati vakili, viloyat bosh imom-xatibi lavozimida ishlagan.
Usmonxon Alimov 2006-yil 8-avgustda O‘zbekiston musulmonlari idorasi raisi, muftiy lavozimiga tayinlanib, 14 yildan buyon shu lavozimda faoliyat olib bormoqda.
Izoh (0)